Ծրագրի մասնակիցները ստացան մասնագիտական խորհրդատվություն ներկայացրած բիզնես գաղափարների վերաբերյալ

 Հայաստանի գործատուների հանրապետական միությունը (ՀԳՀՄ) շարունակում է իրականացնել ձեռնարկատիրական կրթության զարգացման ծրագիրը՝ նախատեսված Լեռնային Ղարաբաղից բռնի տեղահանված անձանց համար, որի նպատակն է աջակցել շահառուների տնտեսական վերաինտեգրմանը, ինքնազբաղվածության հնարավորությունների ընդլայնմանը և նոր բիզնես նախաձեռնությունների զարգացմանը։

Ծրագրի շրջանակներում հունիսի 18-ից հուլիսի 10-ը կազմակերպված դասերը վարեց ՀԳՀՄ Խորհրդի անդամ, Հայաստանի Հաշվապահների Ասոցիացիայի Խորհրդի անդամ Միհրան Թադևոսյանը։ Դասերի թեմաները ներառում էին ձեռնարկատիրության հիմունքները՝ սկսած բիզնեսի էության և տեսակների ներկայացումից մինչև կառավարման հիմնարար սկզբունքներ։ Բացի այդ, քննարկվեցին նաև Հայաստանի Հանրապետությունում բիզնեսի պետական գրանցման ընթացակարգերը, իրավական կարգավորումները, հարկային համակարգի առանձնահատկությունները և գործարարների հիմնական պարտավորությունները։

Մասնակիցները ծանոթացան շուկայի ուսումնասիրության մեթոդաբանությանը, տվյալների վերլուծության գործիքակազմին, սովորեցին գնահատել նպատակային լսարանը, վերլուծել մրցակիցների գործունեությունը և կանխատեսել հնարավոր ռիսկերը՝ հիմնվելով իրատեսական տնտեսական ցուցանիշների վրա։ Ակտիվ քննարկումների ընթացքում մասնակիցները ներկայացրեցին սեփական բիզնես գաղափարները և ստացան մասնագիտական խորհրդատվություն Միհրան Թադևոսյանի կողմից։

Հիշեցնենք, որ ծրագիրն իրականացվում է Աշխատանքի միջազգային կազմակերպության (ԱՄԿ) աջակցությամբ՝ «ԱՄԿ լիազոր գործընկերների կարողությունների զարգացում՝ աշխատանքի ոչ ֆորմալ դրսևորումների կանխման և ֆորմալացման անցման խթանման ուղղությամբ, փախստականների հետ կապված ճգնաժամի համատեքստում» նախաձեռնության շրջանակներում։