Ամփոփվեց ՀԳՀՄ անդամների կարողությունների հզորացման երկամսյա կրթական ծրագիրը

Հունիսի 25-ից օգոստոսի 15-ը Հայաստանի գործատուների հանրապետական միությունն (ՀԳՀՄ) իրականացրեց անդամների կարողությունների հզորացմանն ուղղված ծրագիր, որի նպատակն էր նպաստել ՀԳՀՄ անդամ կամակերպությունների բիզնես կառավարման հմտությունների կատարելագործմանը, ֆինանսական գրագիտության բարձրացմանը, ինչպես նաև բիզնես գործընթացներում արհեստական բանականության (AI) գործիքների կիրառման հմտությունների զարգացմանը։


Ծրագիրն իրականացվեց Աշխատանքի միջազգային կազմակերպության (ԱՄԿ) աջակցությամբ՝ «ԱՄԿ լիազոր գործընկերների կարողությունների զարգացում՝ աշխատանքի ոչ ֆորմալ դրսևորումների կանխման և ֆորմալացման անցման խթանման ուղղությամբ, փախստականների հետ կապված ճգնաժամի համատեքստում» նախաձեռնության շրջանակում։

Երկամսյա ծրագրի ընթացքում իրականացվեց 16 դասընթաց, որոնք վարեցին ոլորտի առաջատար մասնագետներ.

• Շավարշ Կարապետյանը, ՀԳՀՄ Խորհրդի անդամ, «Karapp» ՍՊԸ և AI Ակադեմիայի համահիմնադիր
• Սողոմոն Միրզոյանը, ՀԳՀՄ Խորհրդի անդամ, «Հայաստանի ֆինանսիստների ասոցիացիա» ՀԿ նախագահ
• Վահագն Դիլբարյանը, «100 բիզնես գաղտնիքներ» և «101 բիզնես գաղտնիքներ» բեսթսելերների հեղինակ, AI Ակադեմիայի համահիմնադիր
• Սամվել Գևորգյանը, բիզնեսի կառավարման խորհրդատու, բիզնես-փորձագետ, «Բի Էս Սի» (BSC) Բիզնեսի Աջակցման Կենտրոնի հիմնադիր-տնօրեն և մի շարք բիզնեսների հիմնադիր
• Նունե Վարոսյան, ՄՌ մասնագետ, «Բի Էս Սի» (BSC) Բիզնեսի Աջակցման Կենտրոնի փորձագետ
• Ջուլիա Վարդանյան, ՄՌ կառավարման մասնագետ, «Բի Էս Սի» (BSC) Բիզնեսի Աջակցման Կենտրոնի փորձագետ

Դասընթացները ներառում էին երեք հիմնական բաղադրիչ․

1.Կոշտ հմտությունների զարգացում (Hard Skills)

• Մարդկային ռեսուրսների կառավարում և աշխատուժի պլանավորում
• Թվային հմտություններ և տվյալների վերլուծություն բիզնեսում
• Ֆինանսական գրագիտություն և ռիսկերի կառավարում
• Մասնագիտական ցանցերի ընդլայնում և գործընկերային հարաբերություններ
• Աշխատանքի անվտանգության ապահովում և առողջության պահպանում

2.Փափուկ հմտությունների զարգացում (Soft Skills)

• Ռազմավարական պլանավորում և առաջնորդություն
• Արդյունավետ հաղորդակցություն և բանակցությունների վարում
• Փոփոխությունների կառավարում և որոշումների ընդունում
• Մշակութային բազմազանության արդյունավետ կառավարում
• Էմոցիոնալ ինտելեկտ և կառավարում
• Թիմային աշխատանքի կազմակերպում և ժամանակի կառավարում

3.Արհեստական բանականության ինտեգրում բիզնես գործընթացներում (AI Integration)

• ԱԲ-ի հիմունքներ և կիրառություններ բիզնեսում
• Տեխնիկական գործիքների ընտրություն և ներդրում
• Գործնական ԱԲ լուծումներ մրցունակության բարձրացման համար
• ԱԲ-ի ոլորտային կիրառություններ
• Ռազմավարական առաջնորդություն ԱԲ-ի դարաշրջանում

Երկամսյա կրթական ծրագրի արդյունքում ՀԳՀՄ 30 անդամ կազմակերպությունների ներկայացուցիչներ հնարավորություն ունեցան հարստացնել իրենց ձեռնարկատիրական գիտելիքները և ձեռք բերել նոր գործնական հմտություններ, որոնք կնպաստեն կազմակերպությունների արդյունավետ կառավարմանը, մրցակցային դիրքերի ամրապնդմանը, ինչպես նաև թվային և նորարարական լուծումների ինտեգրմանը բիզնեսի զարգացման գործընթացում։ Դասընթացների շրջանակներում մասնակիցները ամրապնդեցին ռազմավարական պլանավորման և փոփոխությունների կառավարման վերաբերյալ իրենց գիտելիքները, զարգացրեցին հաղորդակցման և բանակցային հմտությունները, կատարելագործեցին թիմային աշխատանքի արդյունավետ կազմակերպման գործնական հմտությունները։ Միաժամանակ ուսումնասիրվեցին ժամանակի կառավարման, նպատակների սահմանման և առաջնահերթությունների դասակարգման գործիքները, ինչպես նաև էմոցիոնալ ինտելեկտի դերը և մշակութային տարբերությունների ազդեցությունը բիզնես միջավայրում։ Բացի այդ, մասնակիցները ձեռք բերեցին գիտելիքներ ֆինանսական գրագիտության ոլորտում՝ ուսումնասիրելով ռիսկերի նվազեցման գործիքակազմը, ներդրումային նախաձեռնությունների գնահատման մեխանիզմները և կայուն զարգացմանն ուղղված ֆինանսական պլանավորման գործնական մոտեցումները։ Արհեստական բանականության գործիքներին նվիրված բացառիկ մոդուլը մասնակիցներին տրամադրեց սոցիալական մեդիայի կառավարման և կոնտենտ մարքեթինգի նորարարական լուծումներ՝ բրենդի ճանաչելիությունն ու մրցունակությունը բարձրացնելու համար։


Շնորհակալություն ենք հայտնում ծրագրի բանախոսներին մասնագիտական բարձր պատրաստվածության, իրենց հարուստ փորձը մասնակիցների հետ կիսելու պատրաստակամության և արդի մոտեցումների կիրառման համար։

Հայաստանի գործատուների հանրապետական միությունը, հավատարիմ մնալով իր առաքելությանը, հետևողականորեն շարունակելու է իր գործունեությունը՝ ուղղված անդամ կազմակերպությունների կարողությունների հզորացմանը, նպատակ ունենալով բարձրացնել ձեռներեցների պրակտիկ և կառավարչական հմտությունները՝ ի նպաստ բիզնեսի կայուն զարգացման և տնտեսական առաջընթացի խթանման։