Եղվարդում գործող եզակի ջայլամաբուծական տնտեսութումը՝ ՀԳՀՄ ուշադրության կենտրոնում

Հունիսի 28-ի ճանաչողական այցի շրջանակներում Հայաստանի գործատուների հանրապետական միության (ՀԳՀՄ) նախագահ Վահագն Համբարձումյանն ու ՀԳՀՄ Խորհրդի անդամ Շավարշ Կարապետյանը այցելեցին նաև Կոտայքի մարզի Եղվարդ քաղաքում գործող «Էկո Ֆերմա» ընկերություն՝ նպատակ ունենալով բացահայտել Հայաստանում գործող եզակի ջայլամաբուծական տնտեսության ներուժը։

 

«Էկո Ֆերմա» ՍՊԸ–ն միակն է Հայաստանի շուկայում, որը զբաղվում է ջայլամի մսի և ձվի արտադրությամբ, և միակն է ամբողջ աշխարհում, որն արտադրում է շուրջ 50 տեսակի խնամքի միջոցներ՝ ջայլամի յուղի հիմքով։ Այն հիմնադրվել է 2017 թվականին և գործում է երեք հիմնական ուղղությամբ՝

1. Ջայլամաբուծություն՝ մսի և ձվի արտադրություն և իրացում։
2. Բնական խնամքի միջոցների արտադրություն՝ բացառապես ջայլամի յուղի հիմքով պատրաստված։
3. Ագրոտուրիզմ և հանրային սննդի սպասարկում՝ ներառյալ «Ostrich Garden» ընտանեկան ռեստորանը։

Ընկերության կոսմետիկ արտադրանքը սերտիֆիկացված է ԵԱՏՄ ստանդարտներով, հաստատված է ԱՄՆ Սննդի և դեղերի վարչության (FDA) կողմից, արտահանվում է տարբեր երկրներ և հասանելի է միջազգային հարթակներում՝ Amazon և Wildberries։

«Ostrich Garden» ընտանեկան ռեստորանը իր յուրահատուկ խոհանոցով և գեղատեսիլ միջավայրով մեծ պահանջարկ է վայելում թե՛ տեղացի, թե՛ արտասահմանցի այցելուների շրջանում։ Ընկերությունն ակտիվորեն զարգացնում է նաև կրթական ագրոտուրիզմի ուղղությունը՝ դառնալով դպրոցական տուրերի շուկայի առաջատարներից մեկը։ Ներկայումս ընդլայնվում է ընկերության միջազգային համագործակցությունը ռուսական և արաբական շուկաներում։

Նմանատիպ ճանաչողական այցերը շարունակական բնույթ են կրելու` նպատակ ունենալով բացահայտել տարբեր ընկերությունների նորարարական մոտեցումները, բացահայտել ՀՀ արտադրական ներուժն ու առկա հնարավորությունները և ձևավորել գործատուների միջև համագործակցության, փորձի փոխանակման արդյունավետ հարթակներ։





​​​​​​​