էմոցիոնալ ինտելեկտի և մշակութային գործոնների ազդեցությունը բիզնեսի վրա

Հայաստանի գործատուների հանրապետական միությունը (ՀԳՀՄ) շարունակում է իր անդամների կարողությունների հզորացման դասընթացները։ Մասնակիցներն այս անգամ ծանոթացան բիզնեսի արդյունավետ կառավարման գործում էմոցիոնալ ինտելեկտի նշանականությանը, մշակութային տարբերություններին և դրանց ազդեցությանը բիզնեսում։

Դասընթացը վարեց «Բի Էս Սի» (BSC) բիզնեսի աջակցման կենտրոնի փորձագետ Ջուլիա Վարդանյանը, ով ներկայացրեց էմոցիոնալ ինտելեկտի (EI) հիմնական բաղադրիչները, մասնավորապես՝ ինքնաճանաչումը, ինքնակառավարումը, սոցիալական գիտակցությունն ու հարաբերությունների կառավարումը։ Քննարկվեցին այն մեխանիզմները, որոնց շնորհիվ բարձր էմոցիոնալ ինտելեկտ ունեցող ղեկավարները կարողանում են ստեղծել վստահության մթնոլորտ, արդյունավետ կերպով ղեկավարել թիմերը և նվազեցնել ներքին կոնֆլիկտները։ Հատուկ ուշադրություն դարձվեց սեփական հույզերի ճանաչման և կառավարման հմտություններին, ինչպես նաև հուզական գործիքակազմի կիրառմանը որոշումների կայացման և բանակցությունների ընթացքում։

Դասընթացի երկրորդ մասում քննարկվեցին մշակութային տարբերությունների բնույթն ու դրանց ազդեցությունը կազմակերպությունների միջմշակութային և միջազգային համագործակցության, բանակցությունների վարման, գործընկերային և աշխատանքային հարաբերությունների վրա։ Հիմնվելով Գերտ Հոֆստեդեի մշակութային չափորոշիչների և ժամանակակից սոցիոլոգիական հետազոտությունների վրա՝ Ջուլիա Վարդանյանը ներկայացրեց, թե ինչպես են արժեքային համակարգերը, անհատականության և հավաքականության հարաբերակցությունը, ինչպես նաև անորոշության հանդեպ հանդուրժողականությունը ձևավորում բիզնես վարքագիծը։

Դասերի ընթացքում մասնակիցները ներգրավվեցին գործնական վարժությունների, քննարկումների և խմբային աշխատանքների մեջ` ձեռք բերելով սեփական փորձը փոխանակելու, տարբեր գործարար միջավայրերի մոտեցումները համեմատելու և իրական օրինակներ վերլուծելու հնարավորություն։

Շնորհակալություն ենք հայտնում Ջուլիա Վարդանյանին՝ մասնակիցներին նոր գիտելիքներ և հմտություններ փոխանցելու, ինչպես նաև իր հարուստ փորձառությամբ կիսվելու և ոգեշնչելու համար։