Ֆինանսական գրագիտություն և ռիսկերի կառավարում՝ ՀԳՀՄ անդամների կարողությունների հզորացման շրջանակներում

Հայաստանի գործատուների հանրապետական միությունը (ՀԳՀՄ) շարունակում է իրականացնել ՀԳՀՄ անդամների կարողությունների հզորացմանն ուղղված դասընթացները։ Մասնակիցներն այս անգամ ծանոթացան ֆինանսական գրագիտության և ռիսկերի կառավարման հիմնարար սկզբունքներին՝ բիզնեսի կայուն զարգացման և նվազագույն ռիսկերի ապահովման նպատակով։ Այս շրջանակում կազմակերպված հերթական դասընթացի ընթացքում մասնակիցներն այս անգամ ծանոթացան ֆինանսական գրագիտության և ռիսկերի կառավարման հիմնարար սկզբունքներին, որոնք առանցքայինդեր ունեն բիզնեսի կայուն զարգացման և ռիսկերի նվազեցման գործընթացում

«Հայաստանի ֆինանսիստների ասոցիացիա» ՀԿ նախագահ, ֆինանսական փորձագետ-խորհրդատու, տ.գ.թ. Սողոմոն Միրզոյանը դասընթացի մասնակիցների հետ կիսվեց իր արժեքավոր փորձով հետևյալ ուղղություններով՝

• Ֆինանսական պլանավորման ժամանակակից մեթոդաբանություն
• Փաստացի ցուցանիշների արդյունավետ հաշվառման համակարգ
• Ֆինանսական վերլուծության կառավարչական նշանակությունը
• Ներդրումային նախագծերի ռիսկերի գնահատման առաջադիմական գործիքակազմ
• Բիզնեսի ֆինանսական ռազմավարության մշակման սկզբունքներ։

Դասընթացի ընթացքում հատուկ ուշադրություն դարձվեց ներդրումային նախագծերի ռիսկերի գնահատման ժամանակակից գործիքակազմի ներկայացմանը, մասնավորապես` դիսկոնտավորված շահույթի (NPV), եկամտաբերության ներքին շեմի (IRR), շահութաբերության գործակցի (PI) և ներդրումների հետգնման դիսկոնտավորված ժամկետի (DPP) ցուցանիշների հաշվարկի մեթոդաբանությանը և գործնական կիրառությունը: Քննարկվեցին նաև սնանկացման ռիսկերի վաղաժամ բացահայտման և նվազեցման ռազմավարությունները, կապիտալի օգտագործման առավելագույն արդյունավետության ապահովման մեթոդները, ֆինանսական ռեսուրսների օպտիմալ բաշխման սկզբունքները:

Ֆինանսական գրագիտությանն ուղղված այս դասընթացն առանձնացավ իր նորարարական բովանդակությամբ և ներդրումային մտածողության զարգացմանն ուղղված մոտեցումներով։

Շնորհակալություն ենք հայտնում Սողոմոն Միրզոյանին մասնակիցների հետ ֆինանսական ոլորտի խորքային գիտելիքներով, ժամանակակից և կիրառական մեթոդաբանությամբ կիսվելու համար։ ՀԳՀՄ շարունակելու է իրականացնել գործատուների կարողությունների հզորացմանն ուղղված ծրագրեր՝ նպատակ ունենալով բարձրացնել մասնակիցների պրակտիկ և կառավարչական հմտությունները տնտեսական զարգացումը խթանելու համար։