Համատեղ քննարկվեցին առողջության համընդհանուր ապահովագրության գործարկման խնդիրները

Փետրվարի 5-ին տեղի ունեցավ հանդիպում Հայաստանի գործատուների հանրապետական միության նախագահ Վահագն Համբարձումյանի և ՀՀ առողջապահության նախարար Անահիտ Ավանեսյանի միջև։ Հանդիպմանը ներկա էին նաև Միության փորձագետներ Սիրանուշ Ներսիսյանն ու Հասմիկ Իգիթխանյանը, ինչպես նաև Առողջապահության նախարարի առաջին տեղակալ Լենա Նանուշյանն ու ՀՀ ԱՆ պետական առողջապահական գործակալության պետ Սամվել Խարազյանը։

Հանդիպման առանցքում 2026 թվականի հունվարի 1-ից ուժի մեջ մտած «Առողջության համընդհանուր ապահովագրության մասին» ՀՀ օրենքի գործնական կիրառման ընթացքում վերհանված խնդիրների քննարկումն էր։ Մասնավորապես, անդրադարձ կատարվեց այն հիմնական մարտահրավերներին, որոնց բիզնես համայնքը բախվում է առողջության համընդհանուր ապահովագրության համակարգի գործարկման նախնական փուլում։

Վահագն Համբարձումյանը ներկայացրեց գործատուների դիրքորոշումն ու մտահոգությունները՝ ընդգծելով, որ բարեփոխումները պետք է միաժամանակ պահպանեն բիզնեսի մրցունակությունը և նպաստեն սոցիալական պաշտպանության համակարգի զարգացմանը։ Որոշ հարցեր տեղում ստացան իրենց լուծումները, իսկ մյուսները տեղափոխվեցին քննարկման հաջորդ փուլ։

Արձագանքելով բարձրացված հարցերին՝ Անահիտ Ավանեսյանը կարևորեց գործատուների հետ շարունակական համագործակցությունը և նշեց, որ ներկայացված խնդիրներն ու առաջարկները կդիտարկվեն համակարգի կատարելագործման շրջանակում։ Նա ընդգծեց նաև սոցիալական գործընկերների հետ կառուցողական երկխոսության նշանակությունը՝ նշելով, որ օրենքի ներդրման գործընթացում հաշվի կառնվեն շահագրգիռ կողմերի կարծիքներն ու առաջարկները՝ համակարգի կայուն և արդյունավետ գործարկումն ապահովելու նպատակով։

Միության նախագահ Վահագն Համբարձումյանը բարձր գնահատեց նման բաց և կառուցողական երկխոսության ձևաչափով հանդիպումները՝ ընդգծելով, որ շարունակական քննարկումների արդյունքում հնարավոր է հասնել շոշափելի դրական արդյունքների։