Հանդիպում ՀԳՀՄ-ին անդամակցող մի շարք կազմակերպությունների ղեկավարների և ներկայացուցիչների հետ

2024թ. սեպտեմբերի 18-ին Հայաստանի գործատուների հանրապետական միության (ՀԳՀՄ) նախագահ Վահագն Համբարձումյանի նախաձեռնությամբ կազմակերպվեց հանդիպում ՀԳՀՄ-ին անդամակցող մի շարք կազմակերպությունների ղեկավարների և ներկայացուցիչների հետ, ովքեր երկարատև գործունեություն են ծավալել ՀԳՀՄ կազմում։

Հանդիպումը նպատակաուղղված էր համագործակցության հեռանկարների և անդամակցության շարունակականության հստակեցմանը։

ՀԳՀՄ նախագահը ներկայացրեց 2024թ. հունիս-սեպտեմբեր ամիսներին ՀԳՀՄ գործադիր մարմնի կողմից իրականացված աշխատանքները, ներառյալ` անդամների շտեմարանների թվայնացումը, նոր անդամների ներգրավումը, Միության տեսլականի և ռազմավարական նպատակների սահմանումը, Խորհրդի անդամների և անձնակազմի վերապատրաստման դասընթացների մասնակցությունը, նախագահի միջազգային և տեղական կազմակերպությունների հետ նոր համագործակցության հաստատումը, ՀԳՀՄ ռեբրենդինգին միտված գործողությունների պլանը և այլն։ Ներկայացվեց նաև Խորհրդի կողմից հավանության արժանացած բարեփոխումների փաթեթը` ուղղված մի շարք օրենսդրական և կառավարչական հարցերի կարգավորմանը։

Ծանոթանալով ՀԳՀՄ անդամների շահերի պաշտպանությանը միտված Միության քաղաքականությանն ու նոր տեսլականին` անդամ կազմակերպությունների ներկայացուցիչները նախագահին ուղղեցին իրենց հուզող հարցերը, ինչպես նաև հանդես եկան տարբեր առաջարկներով։ Քննարկման ընթացքում հստակեցվեցին ՀԳՀՄ հետագա անդամակցության համար անհրաժեշտ նոր պայմաններն ու պահանջները։

Հանդիպման արդյունքում ներկայացուցիչների գերակշիռ մասը հավանության արժանացրեց ՀԳՀՄ Խորհրդի և գործադիր մարմնի կողմից մշակված բարեփոխումների փաթեթը և պատրաստակամություն հայտնեց շարունակելու համագործակցության ամրապդմանն ուղղված միասնական ջանքերը։