ՀԳՀՄ և Երևանում ԵԽ գրասենյակի համատեղ աշխատաժողով` ներառական զբաղվածության խթանման ուղղությամբ

17-11-2026
ՀԳՀՄ և Երևանում ԵԽ գրասենյակի համատեղ աշխատաժողով` ներառական զբաղվածության խթանման ուղղությամբ

Նոյեմբերի 13–14-ը Հայաստանի գործատուների հանրապետական միության (ՀԳՀՄ)  և Երևանում Եվրոպայի խորհրդի գրասենյակի հետ համատեղ համագործակցությամբ Ծաղկաձորում կայացավ երկօրյա արտագնա աշխատաժողով՝ նվիրված զբաղվածության ոլորտում հաշմանդամություն ունեցող անձանց իրավունքների խթանմանը՝ Եվրոպական սոցիալական խարտիայի համատեքստում։

Աշխատաժողովի մասնակիցներին ողջունեց «Հայաստանում մարդու սոցիալական իրավունքների ամրապնդումը» ծրագրի ավագ պատասխանատու Մարիամ Ալեքսանյանը` ներկայացնելով Եվրոպայի խորհրդի կողմից այս ուղղությամբ իրականացվող աշխատանքները և ընդգծելով հաշմանդամություն ունեցող անձանց իրավունքների պաշտպանության, հասարակական կյանքում նրանց լիարժեք մասնակցության և զբաղվածության հավասար հնարավորությունների ապահովման անհրաժեշտությունը։ Նա նաև անդրադարձավ գործատուների հետ երկխոսության և նրանց փորձի ու կարիքների հաշվառման նշանակությանը՝ ներառական զբաղվածության ոլորտում առկա խնդիրներին հասցեական լուծումներ գտնելու տեսանկյունից։

ՀԳՀՄ գործադիր տնօրեն Լիլիթ Ադամյանն իր ողջույնի խոսքում կարևորեց նման նախաձեռնությունների դերը գործատուների իրազեկվածության բարձրացման, միջազգային չափորոշիչների գործնական կիրառման և ներառական աշխատանքային միջավայրի ձևավորման գործում։ Նա շնորհակալություն հայտնեց ԵԽ գրասենյակին արդյունավետ համագործակցության և Միության անդամ գործատուների կարողությունների շարունակական զարգացմանն աջակցելու համար։

ՀԳՀՄ նախագահի տեղակալ Մարիա Խախամյանն էլ ընդգծեց, որ ներառական աշխատավայրերի ձևավորումը ոչ միայն սոցիալական պատասխանատվության դրսևորում է, այլև կարևոր նախապայման՝ խտրականությունից զերծ աշխատանքային միջավայրի ձևավորման, աշխատուժի ներուժի լիարժեք օգտագործման և բիզնեսի կայուն զարգացման համար։

Աշխատաժողովի հիմնական թեմաները ներկայացրեց ԵԽ գրասենյակի ազգային փորձագետ և խորհրդատու Սերգեյ Ղազինյանը, ով ներկայացրեց հաշմանդամություն ունեցող անձանց իրավունքների պաշտպանության միջազգային և ազգային իրավական շրջանակները, զբաղվածության հավասար հնարավորությունների ապահովման մեխանիզմներն ու ներառական աշխատանքային միջավայրի ձևավորման գործնական մոտեցումները։

ՀԳՀՄ նախագահի տեղակալ, աշխատանքի անվտանգության և առողջության փորձագետ Նարե Սարգսյանն անդրադարձավ հաշմանդամություն ունեցող անձանց ներառմանն ուղղված անվտանգության և առողջության պահպանման պահանջներին՝ ներկայացնելով գործատուների պարտավորությունները, ներառական ռիսկերի գնահատման, աշխատանքային միջավայրի հարմարեցման և անվտանգ ու առողջ պայմանների ապահովման լուծումները։

Երկօրյա աշխատաժողովի ընթացքում ՀԳՀՄ 25 անդամ ընկերությունների ներկայացուցիչներ հնարավորություն ունեցան ձեռք բերելու և խորացնելու գործնական գիտելիքներն ու հմտությունները Եվրոպական սոցիալական խարտիայի մի շարք հոդվածների, հաշմանդամություն ունեցող անձանց իրավունքների և զբաղվածության ոլորտում հավասարության, աշխատավայրում անվտանգության և առողջության պահպանման առանձնահատկությունների, ողջամիտ հարմարեցումների և դրանց կիրառման գործնական մեխանիզմների, ԱՄԿ թիվ 190 կոնվենցիայի համատեքստում աշխատավայրում բռնության, ոտնձգությունների և խտրականության կանխարգելման վերաբերյալ։

Տեսական քննարկումներին զուգահեռ իրականացվեցին գործնական և խմբային աշխատանքներ՝ ներառական աշխատանքի հայտարարությունների վերանայման, ողջամիտ հարմարեցումների կիրառման, ինչպես նաև աշխատավայրում բռնության, ոտնձգությունների և խտրականության կանխարգելման ներքին քաղաքականությունների ու բողոքների ներկայացման ընթացակարգերի մշակման ուղղություններով։

Աշխատաժողովը նաև հնարավորություն տվեց բացահայտելու Հայաստանում ներառական զբաղվածության խթանման ընթացքում գործատուների առջև ծառացած մարտահրավերներն ու գործնական խոչընդոտները, ինչպես նաև հետագա կարողությունների զարգացման կարիքները։

Այլ նորություններ #tag-ով

ՎԵՐՋԻՆ ՆՈՐՈՒԹՅՈՒՆՆԵՐԸ