ՀԳՀՄ Խորհրդի անդամների ճանաչողական այցը մեղվաբուծական առաջատար ընկերություն

Հունիսի 28-ին Հայաստանի գործատուների հանրապետական միության (ՀԳՀՄ) նախագահ Վահագն Համբարձումյանն ու ՀԳՀՄ Խորհրդի անդամ Շավարշ Կարապետյանը ճանաչողական այց կատարեցին Կոտայքի մարզի Եղվարդ քաղաքում գործող «Եղվարդի նեկտար» առաջատար մեղվաբուծական ընկերություն։ Այցի նպատակն էր տեղում ծանոթանալ ընկերության արտադրական գործընթացին, նորարարական մոտեցումներին և շուկայում արձանագրած հաջողություններին։

«Եղվարդի նեկտար» ՍՊԸ-ն հիմնադրվել է 1997 թվականին՝ ընտանեկան ավանդական տնտեսության հիման վրա։ Ընկերությունը ներկայացնում է «Royal Jelly» ապրանքանիշը, որը տարիների ընթացքում ձեռք է բերել զգալի աճ՝ դառնալով Հայաստանի առաջատար ընկերություն բարձրորակ մեղվամթերքի արտադրության ոլորտում:

Այսօր ընկերությունն արտադրում է 15 տեսակի մեղր, սակայն նախատեսում է տեսականին ընդլայնել՝ հասցնելով մինչև 50 անուն։ Տարեկան արտադրական ծավալը հասնում է մինչև 50 տոննայի, իսկ արտադրանքը հաջողությամբ արտահանվում է Ֆրանսիա, ԱՄՆ և Չինաստան։ Ընկերության զարգացման հեռանկարներում ներառված է նաև մեղրի հիմքով ալկոհոլային խմիչքների՝ մեղրի օղու, բրենդիի, գինու և վիսկիի արտադրության մեկնարկը։

Ամեն տարի կազմակերպությունը սահմանամերձ գյուղերում նախաձեռնում է անհատական մեղվատնտեսությունների ստեղծման ծրագիր՝ տրամադրելով մեղվաընտանիքներ և աջակցություն։