ՀՀ Առողջապահության նախարարի հետ քննարկվեցին ապահովագրության նոր համակարգի ներդրման մանրամասները

Դեկտեմբերի 4-ին ՀՀ ԱՆ Վ.Ա. Ֆանարջյանի անվան ուռուցքաբանության ազգային կենտրոնի նիստերի դահլիճում, ՀՀ Առողջապահության նախարարի գլխավորությամբ, տեղի ունեցավ քննարկում «Առողջության համընդհանուր ապահովագրության մասին» ՀՀ օրենքի նախագծի վերաբերյալ։

Հանդիպումը կազմակերպվել էր ՀՀ Առողջապահության նախարար Անահիտ Ավանեսյանի նախաձեռնությամբ` առողջության համընդհանուր ապահովագրության համակարգի ներդրմանն ընդառաջ` գործատուների, մասնագիտական համայնքի և շահագրգիռ կողմերի հետ նախագիծը մանրամասն ներկայացնելու և քննարկելու նպատակով։

Քննարկմանը մասնակցում էին նաև Հայաստանի գործատուների հանրապետական միության նախագահ Վահագն Համբարձումյանը և Միության բազմաթիվ անդամներ, ովքեր անդրադարձան մի շարք կարևոր հարցերի, որոնք վերաբերում էին ապահովագրավճարի հաշվարկման մեխանիզմներին, դրա գոյացման սկզբունքներին, սոցիալական տարբեր խմբերի սուբսիդավորման հնարավորություններին, նոր համակարգի հնարավոր ազդեցությանը բիզնես միջավայրի վրա, ինչպես նաև գործատուների ֆինանսական և վարչական պարտավորություններին։

Նշենք, որ օրենսդրական նախագծի նպատակն է աջակցել  Հայաստանի Հանրապետությունում սոցիալական համերաշխության միջավայրի ձևավորմանը, նպաստել բնակչության առողջապահական կարիքների բավարարմանը, բարձրացնել բժշկական օգնության և սպասարկման ծառայությունների հասանելիության, այդ թվում՝ ֆինանսական հասանելիության աստիճանը, և բարելավել դրանց որակը:

Շուրջ երեք ժամ տևած հանդիպման ընթացքում քննարկմանը ներկա պետական ու մասնավոր ընկերությունների ներկայացուցիչները հարցուպատասխանի միջոցով փորձեցին պարզաբանել ապահովագրության թե՛ ֆինանսական, թե՛ իրավական բաղադրիչի շուրջ հարցերը:

Քննարկմանը ներկա էին նաև ՀՀ ԱՆ Պետական առողջապահական գործակալության տնօրենը, գործընկերներ` Պետական եկամուտների կոմիտեից ու ՀՀ ֆինանսների նախարարությունից: