Կայացավ հեղինակավոր հայ գործարարների հաջողության պատմությունները լուսաբանող գրքի ցուցահանդեսը

Փետրվարի 19-ին «Աղաբաբյանս» ռեստորանային համալիրում տեղի ունեցավ «Հայ գործարարների հարյուր և հինգ բիզնես պատմություն» գիրք-շտեմարանի շնորհանդեսը։ Նախաձեռնության նպատակը հեղինակավոր հայ գործարարների բիզնեսների ստեղծման ուշագրավ պատմությունները ներկայացնելն է։ Այն հայկական ձեռնարկատիրական հմտությունների զարգացման  առաջին շտեմարանն է, որի հեղինակը «Հայաստան-Արցախ-Սփյուռք» համահայկական ամսագրի գլխավոր խմբագիր, «Հայրենիք-սփյուռք կապերի զարգացման» ՀԿ հիմնադիր Լ.Նազարյանն է։

Պատահական չէր, որ գրքի շնորհանդեսին հրավիրված էին նաև Հայաստանի գործատուների հանրապետական միության ներկայացուցիչները` ի դեմս նախագահ Վահագն Համբարձումյանի, CLUB CAPITAL գործարար միության հիմնադիր Գրիգոր Առաքելյանի, Հայաստանի Լիզինգատուների ասոցիացիայի նախագահ Արսեն Բազիկյանի, հաշվի առնելով, որ գործարար համայնքին համախմբող այս կառույցը միավորում է երկար ճանապարհ անցած և հաջողություններ կերտած ձեռներեցներին, ում բիզնես պատմությունները տեղ են գտել շտեմարանում։

Ողջույնի խոսքով հանդես եկավ ՀԳՀՄ նախագահ Վահագն Համբարձումյանը, ով շնորհավորեց գրքի հեղինակին նման կարևոր նախաձեռնությունը կյանքի կոչելու առթիվ` ընդգծելով ձեռնարկատիրական հմտությունների զարգացմանն ուղղված արդի հայ գրականության նշանակալի դերը գործարարների համար։ «Նմանատիպ գրքերը ոչ միայն մասնագիտական աճի կարևոր խթաններ են, այլև արժեքավոր ռեսուրս են համարվում, որտեղ հաջողության հասած  գործարարները կարող են փոխանակվել իրենց առաջատար փորձով և գաղափարներով», - իր խոսքում նշեց Վ.Համբարձումյանը։ Միության նախագահը նաև խորհուրդ տվեց սկսնակ գործարարներին մինչև գործունեություն ծավալելը նախ բացահայտեն իրենց ներուժն ու կարողությունները, հետո նոր ձեռնամուխ լինեն այս կամ այն նախաձեռնությանը, քանի որ ցանկացած հաջողության պատմություն սկսվում է ինքնաճանաչողությունից։

Շնորհավորական ուղերձներով հանդես եկան նաև Միության անդամները, միջոցառմանը հրավիրված գործարարները, ովքեր կիսվեցին սեփական հաջողված փորձով, ներկայացրին այն ռազմավարական քայլերն ու բիզնեսի զարգացման մոդելները, որոնք օգտագործել են տարբեր մարտահրավերներ հաղթահարելու և իրենց ընկերությունների կայուն աճն ու զարգացումն ապահովելու համար: