Կայացավ ՀԳՀՄ Խորհրդի 2026 թվականի 1-ին հերթական նիստը

Փետրվարի 21-ին տեղի ունեցավ Հայաստանի գործատուների հանրապետական միության (ՀԳՀՄ) Խորհրդի հերթական նիստը։
Նիստին առկա և առցանց ձևաչափով մասնակցեցին ՀԳՀՄ Խորհրդի 20 անդամներից 16-ը։

Նիստի օրակարգային հարցերն էին`

1. Միության նախագահի տեղակալի ներկայացում։
2. ՀԳՀՄ նոր անդամների անդամակցության հաստատում։
3. Ապրիլի 10–20-ը ընկած ժամանակահատվածում ՀԳՀՄ-ի կողմից կազմակերպվող «Տնտեսության ֆորմալացումը՝ որպես բիզնեսի աճի նախապայման» խորագրով համաժողովի նպատակի, հիմնական խնդիրների և ակնկալվող արդյունքների ներկայացում։
4. «Հեղինակային իրավունքի և հարակից իրավունքների մասին ՀՀ օրենքում փոփոխություն կատարելու մասին» ՀՀ օրենքի նախագծի քննարկում։
5. ՀՀ վարչապետի 2025 թվականի սեպտեմբերի 22-ի N 835 Լ որոշմամբ` նախարարներին կից հասարակական խորհուրդներում Միության ներգրավում։
6. Օրակարգային այլ հարցեր։

Օրակարգի առաջին հարցի վերաբերյալ Միության նախագահ Վահագն Համբարձումյանը նշեց, որ կանոնադրության համաձայն` նախագահի տեղակալի նշանակումն իրականացվում է նախագահի կողմից, և Խորհրդին ներկայացրեց նախագահի տեղակալ Նարե Սարգսյանին, ով գործուն մասնակցություն է ցուցաբերում Միության ռազմավարական առաջնահերթությունների իրագործման ուղղությամբ։

Երկրորդ հարցի շրջանակում Վ.Համբարձումյանը նշեց, որ Միությունը շարունակում է ընդլայնել անդամների շրջանակը՝ ընդգրկելով ոլորտային առաջատար կազմակերպություններ, որոնց ներուժը և փորձը նպաստում են Միության գործունեության զարգացմանը և գործատուների շահերի համակարգված պաշտպանությանը։

Շնորհավորում ենք ՀԳՀՄ անդամության համար դիմած նոր կազմակերպություններին`

1. "«Ատովմյան» Իրավաբանական Եվ Խորհրդատվական" ՍՊԸ
2. "«Ինֆուս» Ֆորմալ Եվ Ոչ Ֆորմալ Կրթությանն Աջակցող" ՀԿ
3. "Ինտերքարս" ՍՊԸ
4. "Ռիչատո" ՍՊԸ
5. "Հաթերք Ֆուդ" ՍՊԸ
6. "Տաուռուս Ֆինանս" ՍՊԸ
7. "Արմեն Մեսրոբյան" Ա/Ձ
8. "Մարգարիտ Ստեփանյան" Ա/Ձ
9. "Վարուժան Ավանեսյան" Ա/Ձ

Խորհրդի անդամների կողմից միաձայն քվեարկությամբ հաստատվեց նոր կազմակերպությունների անդամակցումը, ինչը կարևոր քայլ է համատեղ ծրագրերի իրականացման, ռեսուրսների արդյունավետ համախմբման և ոլորտային ներուժի առավելագույն օգտագործման ուղղությամբ։

Նիստի օրակարգի երրորդ հարցի շրջանակում Միության նախագահ Վ. Համբարձումյանը Խորհրդին տեղեկացրեց, որ ապրիլի 10-20-ը ընկած ժամանակահատվածում Միության նախաձեռնությամբ տեղի կունենա տնտեսության ֆորմալացման խթանմանն ուղղված համաժողով, որի նպատակն է պետություն-մասնավոր հատված կառուցողական երկխոսության միջոցով համատեղ ձևավորել բիզնեսի զարգացման նոր ճանապարհային քարտեզ՝ ուղղված Հայաստանում ֆորմալ տնտեսության խթանմանը։

Օրակարգի չորրորդ հարցի շրջանակում քննարկվեցին նաև հեղինակային իրավունքի և հարակից իրավունքների պաշտպանության հետ կապված հարաբերությունները կարգավորող նոր օրենսդրական նախագծի հիմնական դրույթները և դրանց կիրառական նշանակությունը։

Միության նախագահը Խորհրդի անդամներին տեղեկացրեց, որ Վարչապետի 2025 թվականի սեպտեմբերի 22-ի N 835-Լ որոշմամբ` նախարարներին կից ստեղծվել են հասարակական խորհուրդներ՝ նպատակ ունենալով խթանել քաղաքացիական հասարակության մասնակցային կառավարումը քաղաքականությունների մշակման գործընթացում։ Վ.Համբարձումյանն ընդգծեց, որ այս շրջանակում Միության ներգրավվածությունը գրեթե բոլոր նախարարություններին և կոմիտեներին կից հասարակական խորհուրդներում էականորեն ընդլայնում է Միության ինստիտուցիոնալ ներկայությունն ու ազդեցության հնարավորությունները պետական քաղաքականությունների ձևավորման փուլում։ Այս հարթակը հնարավորություն է տալիս ոչ միայն համակարգված կերպով ներկայացնել գործատուների դիրքորոշումները, այլև ակտիվորեն մասնակցել ոլորտային քաղաքականությունների մշակմանը և օգտագործել անդամների փորձագիտական ներուժը՝ իրավական ակտերի նախագծերի մշակման և կատարելագործման գործընթացում։

Ամփոփելով օրակարգային հարցերը և միաձայն կողմ քվեարկելով օրակարգային բոլոր հարցերին` Խորհուրդն ավարտեց իր աշխատանքները։