Կայացավ ՀԳՀՄ Խորհրդի հերթական նիստը

Սեպտեմբերի 27-ին տեղի ունեցավ Հայաստանի գործատուների հանրապետական միության (ՀԳՀՄ) Խորհրդի հերթական նիստը։

Նիստին առկա և առցանց ձևաչափով մասնակցեցին ՀԳՀՄ Խորհրդի 20 անդամներից 12-ը։

Նիստի օրակարգային հարցերն էին`

1. ՀԳՀՄ նոր անդամների անդամակցության հաստատում։
2. Միության նախագահի տեղակալի թեկնածուի ներկայացում։
3. Օրակարգային այլ հարցեր։

Օրակարգի առաջին հարցի վերաբերյալ Միության նախագահ Վահագն Համբարձումյանը նշեց, որ Միությունը հետևողականորեն շարունակում է համալրվել նոր անդամներով` ընդգրկելով տարբեր ոլորտների առաջատար կազմակերպություններ, որոնք իրենց փորձով ու ոլորտային հաջողություններով կարող են էական ներդրում ունենալ Միության գործունեության զարգացման, ռազմավարական ուղղությունների առաջմղման և գործատուների շահերի համակարգված ներկայացման գործում։

Շնորհավորում ենք ՀԳՀՄ անդամության համար դիմած նոր կազմակերպություններին`

1. «Եվրոպական բիզնես ասոցիացիա» ՀԿ
2. «Բիզնես և կրթություն գործընկերություն» հիմնադրամ
3. «Քրոու քընսալթինգ» ՍՊԸ
4. «Աշխատանքի անվտանգության և առողջության պահպանման ակադեմիա» ՍՊԸ
5. «Ֆինստաբ» ՍՊԸ
6. «Երկաթ պրոֆֆ» ՍՊԸ
7. «Մեյջոր փարթներս» ՓԲԸ
8. «Ֆոտոսեր» ստուդիա

Խորհրդի անդամների կողմից միաձայն քվեարկությամբ հաստատվեց նոր կազմակերպությունների անդամակցումը, ինչը ևս մեկ քայլ է համատեղ նախագծերի իրականացման, ռեսուրսների համախմբման և տարբեր ոլորտների ներուժի արդյունավետ օգտագործման համար։

Նիստի օրակարգի երկրորդ հարցի շրջանակում Միության նախագահ Վ. Համբարձումյանը նշեց, որ Միության կանոնադրությամբ նախագահի տեղակալի նշանակումն իրականացվում է նախագահի կողմից, և Խորհրդին ներկայացրեց նախագահի տեղակալ Հարություն Գուլյանին։

Միության տնօրեն Լիլիթ Ադամյանը Խորհրդի անդամներին ներկայացրեց առաջիկա անելիքներն ու ծրագրերը` մասնավորապես նշելով, որ Եվրոպայի Խորհրդի երևանյան գրասենյակի հետ սերտ համագործակցությամբ նախատեսվում է արտագնա սեմինար` ուղղված ՀԳՀՄ անդամների կարողությունների զարգացմանը։

Միաձայն կողմ քվեարկելով օրակարգային բոլոր հարցերին` Խորհուրդն ավարտեց իր աշխատանքները։