Կայացավ ԿԳՄՍ նախարարին կից հասարակական խորհրդի առաջին նիստը

Փետրվարի 6-ին տեղի ունեցավ ՀՀ կրթության, գիտության, մշակույթի և սպորտի նախարարին կից ձևավորված նոր հասարակական խորհրդի առաջին նիստը, որը վարում էր նախարար Ժաննա Անդրեասյանը։

Նիստին մասնակցում էր նաև Հայաստանի գործատուների հանրապետական միության գործադիր տնօրեն Լիլիթ Ադամյանը։

Նախարարը շնորհավորեց խորհրդի անդամներին՝ կազմում ընդգրկվելու կապակցությամբ և ընդգծեց, որ խորհուրդն արդեն ունի պաշտոնապես ամրագրված դեր ռազմավարական ծրագրերի վերաբերյալ կարծիք հայտնելու առումով, և նոր աշխատակարգով էլ ավելի է բարձրացել հասարակական խորհրդի դերն ու նշանակությունը ոլորտային քաղաքականությունների մշակման գործընթացում։ Նախարարը կարևորեց նաև այն հնարավորությունը, որ հասարակական խորհուրդները կարող են ձևավորել աշխատանքային խմբեր և դրանց շրջանակում քաղաքականությունների կատարելագործման նպատակով լիազոր մարմնին ներկայացնել բարելավման կոնկրետ առաջարկներ։ Այնուհետև Ժաննա Անդրեասյանը ներկայացրեց օրակարգի հիմնական հարցը, որը ներառում էր Կառավարության գործունեության հնգամյա միջոցառումների շրջանակում 2021 թվականից առ այսօր ԿԳՄՍ ոլորտներում գրանցած ձեռքբերումները, ինչպես նաև 2026 թվականին նախատեսված աշխատանքները։ Զեկույցին հաջորդեց ակտիվ հարցուպատասխան, որի ընթացքում խորհրդի անդամները բարձրաձայնեցին մի շարք հարցեր և ստացան համապատասխան պատասխաններ։

Իր ելույթում ՀԳՀՄ գործադիր տնօրեն Լիլիթ Ադամյանն անդրադարձավ 2024 թվականից ուժի մեջ մտած «Մասնագիտական կրթության և ուսուցման մասին» ՀՀ օրենքի գործնական կիրառման ընթացքում ի հայտ եկած մի շարք խնդիրներին։ Նա ընդգծեց, որ Միությունը հավատարիմ է իր առաքելությանը նպաստելու կրթության և աշխատաշուկայի միջև կապի ամրապնդմանը, խթանելու գործատուների հետ սերտ համագործակցությունը և ապահովելու դուալ կրթության համակարգի արդյունավետ ներդրումը՝ հիմնված աշխատաշուկայի իրական կարիքների վրա։

Նիստի ավարտին ձեռք բերվեց պայմանավորվածություն՝ ներկայացնել առաջարկություններ թեմատիկ ուղղություններով աշխատանքային խմբերի ձևավորման և դրանց գործունեության կանոնակարգի մշակման վերաբերյալ։

Հիշեցնենք, որ 2025 թվականի դեկտեմբերից ՀԳՀՄ–ն ընդգրկվել է ԿԳՄՍ նախարարին կից հասարակական խորհրդի կազմում՝ նպատակ ունենալով ներկայացնել գործատուների համընդհանուր շահերն ու ակտիվորեն մասնակցել ոլորտի քաղաքականության մշակմանն ու կատարելագործմանն ուղղված գործընթացին։