Կայացավ փափուկ հմտությունների զարգացմանն ուղղված գործնական սեմինար-դասընթացը

Հուլիսի 24-ին Հայաստանի գործատուների հանրապետական միության և InfoSkills ընկերության հիմնադիր Վարուժան Ավանեսյանի համատեղ նախաձեռնությամբ տեղի ունեցավ «Փափուկ հմտություններ» (Soft Skills) թեմայով գործնական սեմինար-դասընթացը։

Դասընթացին մասնակցեցին ՀԳՀՄ անդամ կազմակերպությունների ղեկավարներ և ներկայացուցիչներ, ովքեր հետաքրքրված են ժամանակակից կառավարման հմտությունների զարգացման և թիմերի արդյունավետության բարձրացման հարցերով։

Դասընթացը վարեց կազմակերպությունների զարգացման խորհրդատու Վարուժան Ավանեսյանը, ով իր բազմամյա մասնագիտական փորձի հիման վրա ներկայացրեց ժամանակակից կազմակերպություններում փափուկ հմտությունների զարգացման արդյունավետ գործիքներն ու մեթոդները։ Դասընթացն անցկացվեց ինտերակտիվ ձևաչափով՝ ներառելով գործնական վարժություններ, սիմուլյացիաներ, խմբային քննարկումներ և իրական աշխատանքային իրավիճակների վերլուծություն, ինչը մասնակիցներին հնարավորություն տվեց ոչ միայն ձեռք բերել նոր գիտելիքներ, այլև անմիջապես կիրառել դրանք գործնական առաջադրանքների միջոցով։ Մասնակիցները նաև հնարավորություն ունեցան քննարկելու իրենց կազմակերպություններում հանդիպող մարտահրավերները և ստանալու կիրառելի մասնագիտական խորհուրդներ։

Ողջունելով մասնակիցներին՝ Հայաստանի գործատուների հանրապետական միության գործադիր տնօրեն Լիլիթ Ադամյանը նշեց, որ ժամանակակից աշխատաշուկայում մասնագիտական գիտելիքներին զուգահեռ առանցքային նշանակություն ունեն նաև փափուկ հմտությունները, որոնք նպաստում են արդյունավետ հաղորդակցությանը, առաջնորդությանը և կազմակերպությունների կայուն զարգացմանը։ Նա ընդգծեց, որ ՀԳՀՄ-ն հետևողականորեն շարունակելու է իրականացնել նման նախաձեռնություններ՝ աջակցելով անդամ կազմակերպությունների կարողությունների զարգացմանը, մրցունակության բարձրացմանը և ժամանակակից բիզնես միջավայրի պահանջներին համապատասխան մարդկային կապիտալի ձևավորմանը։