ԿԳՄՍ նախարարին կից հասարակական խորհրդի նիստում քննարկվեցին PISA 2025-ի արդյունքները

Հոկտեմբերի 2-ին Երևանի «Հակոբ Կոջոյան» կրթահամալիրում կայացավ ՀՀ կրթության, գիտության, մշակույթի և սպորտի նախարարին կից հասարակական խորհրդի հերթական նիստը, որի օրակարգի հիմնական հարցը PISA 2025 միջազգային գնահատման արդյունքների ներկայացումն էր։
ԿԳՄՍ նախարար Ժաննա Անդրեասյանը ներկայացրեց PISA-ի նպատակն ու նշանակությունը՝ ընդգծելով, որ միջազգային ստուգատեսը հնարավորություն է տալիս գնահատելու ոչ միայն սովորողների գիտելիքները, այլև դրանք իրական կյանքի տարբեր իրավիճակներում կիրառելու կարողությունը։ Նա նշեց, որ Հայաստանի՝ PISA-ին մասնակցության կարևոր նպատակներից է ստացված տվյալների միջոցով հանրակրթության բարեփոխումների ազդեցությունը գնահատելը և կրթական համակարգում անհրաժեշտ բարելավումների ուղղությունները բացահայտելն է։ Հայաստանն առաջին անգամ ստուգատեսին մասնակցել է 2025 թվականին, որը կազմակերպվում է չորս տարին մեկ անգամ։ Այն անցկացվել է երեք հիմնական ուղղությամբ՝ բնական գիտություններ, մաթեմատիկա և ընթերցանություն։ Նախարարը մանրամասն ներկայացրեց, թե բոլոր երեք ուղղություններով ստուգատեսի նվազագույն շեմը հաղթահարած սովորողը ինչ պետք է կարողանա անել։
Քննարկման ընթացքում խորհրդի անդամները բարձրացրեցին կրթության որակի բարելավմանն առնչվող մի շարք հարցեր՝ անդրադառնալով ուսուցման նոր մեթոդներին, գնահատման համակարգին, դպրոցական ծրագրերի և դասագրքերի բարելավմանը, ընթերցանության խթանմանը, դպրոցական միջավայրին, ինչպես նաև կրթության հասանելիությանն ու լրացուցիչ կրթական հնարավորություններին։
Նիստին Հայաստանի գործատուների հանրապետական միությունը ներկայացնում էր գործադիր տնօրեն Լիլիթ Ադամյանը, ով մասնավորապես հետաքրքրվեց, թե PISA-ի արդյունքները որպես կրթական քաղաքականության ախտորոշիչ գործիք օգտագործելով՝ դրանց հիման վրա ինչպիսի բարեփոխումներ են նախատեսվում հանրակրթական համակարգում՝ գիտելիքի փոխանցումից դեպի դրա գործնական կիրառման, վերլուծության և իրական խնդիրների լուծման վրա հիմնված մոտեցման անցումն ապահովելու համար։

Նիստից հետո խորհրդի անդամները «Հակոբ Կոջոյան» կրթահամալիրի տնօրենի ժամանակավոր պաշտոնակատարի ուղեկցությամբ շրջայց կատարեցին վերջերս վերակառուցված հաստատությունում և ծանոթացան ստեղծված ենթակառուցվածքներին: