ԼՂ-ից բռնի տեղահանված անձինք ձեռք բերեցին գործնական ձեռնարկատիրական հմտություններ

Հուլիսի 29-ից օգոստոսի 8-ը Հայաստանի գործատուների հանրապետական միությունն (ՀԳՀՄ) իրականացրեց Լեռնային Ղարաբաղից բռնի տեղահանված անձանց համար ձեռնարկատիրական կրթության զարգացման ծրագրի երկրորդ խմբի դասընթացների շարքը, որն ուղղված էր մեր հայրենակիցների ինքնազբաղվածության խթանմանը և նոր բիզնես նախաձեռնությունների իրագործմանը։

Այս փուլում դասընթացներն իրականացվեցին առցանց ձևաչափով, որը վարեց ՀԳՀՄ Խորհրդի անդամ, ֆինանսիստ Միհրան Թադևոսյանը։ Դասերի ընթացքում մասնակիցները ստացան գործնական և տեսական գիտելիքներ բիզնեսի պետական գրանցման փուլերի, օրենսդրական կարգավորումների, փոքր և միջին բիզնեսի ուժեղ և թույլ կողմերի, ինչպես նաև բիզնես պլանի մշակման վերաբերյալ։

Մասնակիցներն ուսումնասիրեցին նաև կազմակերպության բյուջեի պլանավորման և ֆինանսական կառավարման գործընթացը, ՀՀ հարկային համակարգի առանձնահատկությունները (հարկային օրենսդրություն, հարկատեսակներ), հարկային հաշվետվությունների կազմման և ներկայացման կարգն ու ժամկետները։

Դասընթացներն ուղեկցվեցին ակտիվ քննարկումներով, որոնց ընթացքում մասնակիցները ներկայացրեցին իրենց բիզնես գաղափարները և ստացան անհատական խորհրդատվություն Միհրան Թադևոսյանի կողմից՝ դրանք արդյունավետ իրականացնելու ուղղությամբ։

Հիշեցնենք, որ այս ծրագիրն իրականացվում է Աշխատանքի միջազգային կազմակերպության (ԱՄԿ) աջակցությամբ՝ «ԱՄԿ լիազոր գործընկերների կարողությունների զարգացում՝ աշխատանքի ոչ ֆորմալ դրսևորումների կանխման և ֆորմալացման անցման խթանման ուղղությամբ, փախստականների հետ կապված ճգնաժամի համատեքստում» նախաձեռնության շրջանակում։