«Լիզինգ ֆինանսական գործիքի կիրառումը բիզնեսում» թեմայով սեմինար ՀԳՀՄ անդամների համար

Դեկտեմբերի 5-ին տեղի ունեցավ Հայաստանի գործատուների հանրապետական միության (ՀԳՀՄ) և Հայաստանի Լիզինգատուների Ասոցիացիայի համատեղ կազմակերպած սեմինարը՝ «Լիզինգ ֆինանսական գործիքի կիրառումը բիզնեսում» թեմայով։ Սեմինարի նպատակն էր բացահայտել լիզինգի հնարավորությունները` որպես բիզնեսի արագ զարգացման միջոց։

Հաշվի առնելով այսօր այս գործիքի նկատմամբ աճող պահանջարկը և մի շարք բանկերի և վարկային կազմակերպությունների ներհոսքը դեպի այս շուկա, օրեցօր աճող լիզինգի պորտֆելը, ինչպես նաև մի շարք պետական և ոչ պետական աջակցության ծրագրերի ու գործիքների առկայությունը՝ գործարարներին անհրաժեշտ Է լինել տեղեկացված ֆինանսական այս ռեսուրսի բոլոր առանձնահատկություններին և առավելություններին։

Սեմինարը վարեց Հայաստանի Լիզինգատուների Ասոցիացիայի նախագահ Արսեն Բազիկյանը, ով ներկայացրեց լիզինգի էությունը, գործարքի բովանդակությունը, փուլերը և նրանց առանձնահատկությունները։ Նա շեշտեց, որ լիզինգը, լինելով արդյունավետ և ճկուն ֆինանսական լուծում, կարող է նշանակալի օգուտներ բերել բիզնեսին՝ հնարավորություն տալով նվազեցնել նախնական ներդրումների պահանջները և ֆինանսական ռիսկերը, այնուհետև ապահովել կանխատեսելի վճարումների համակարգ։

Սեմինարն անցկացվեց ինտերակտիվ ձևաչափով, որի ընթացքում մասնակիցները հնարավորություն ունեցան քննարկելու լիզինգի գործնական կիրառման տարբեր կողմերը՝ ինչպես ճիշտ կողմնորոշվել տեխնիկայի, սարքավորումների և տրանսպորտի ընտրության հարցերում, ինչպես նաև ինչպիսի գործնական մոտեցումներ կարելի է կիրառել լիզինգի պայմանների գնահատման և մատակարարների հետ արդյունավետ համագործակցության հարցերում։

Սեմինարը հնարավորություն տվեց մասնակիցներին հասկանալու լիզինգը որպես ժամանակակից փոքր և միջին բիզնեսի շարժիչ ուժ և օգտագործելու այն թիրախավորված շուկայում, ինչպես նաև փոխարինելու մեծ նախնական ներդրումները կանխատեսելի և կառավարելի վճարումներով։

Շնորհակալություն ենք հայտնում Արսեն Բազիկյանին՝ ՀԳՀՄ անդամների հետ արժեքավոր տեղեկատվությամբ կիսվելու և բիզնեսի զարգացման նոր ուղիներ բացահայտելու համար։