Մեկնարկել են ձեռնարկատիրական կրթության ծրագրի երրորդ խմբի դասընթացները ԼՂ տեղահանված անձանց համար

Օգոստոսի 12-ին մեկնարկեցին Լեռնային Ղարաբաղից բռնի տեղահանված անձանց համար նախատեսված ձեռնարկատիրական կրթության զարգացման ծրագրի երրորդ խմբի դասընթացները, որոնք իրականացվում են Հայաստանի գործատուների հանրապետական միության նախաձեռնությամբ։ Ծրագիրը նպատակաուղղված է մեր արցախցի հայրենակիցների բիզնես մտածողության ու գործարար հմտությունների զարգացմանը, նրանց ինքնազբաղվածության և ձեռներեցության խթանմանը, սոցիալ-տնտեսական ինտեգրմանը։

Ծրագրի երրորդ խմբի դասընթացները կազմակերպվում են հիբրիդ ձևաչափով` համատեղելով առկա և հեռավար ուսուցումը, ինչը հնարավորություն է տալիս ընդլայնել ծրագրի աշխարհագրական հասանելիությունը և ապահովել ՀՀ տարբեր մարզերում բնակվող շահառուներին մասնակցությունը դասընթացներին։

Ծրագրի շրջանակում նախատեսված է իրականացնել 12 թեմատիկ դասընթաց, որոնք կվարեն ոլորտի փորձառու մասնագետներ` ՀԳՀՄ Խորհրդի անդամ, մասնագիտությամբ տնտեսագետ, ֆինանսիստ Միհրան Թադևոսյանն ու «Հայաստանի ֆինանսիստների ասոցիացիա» ՀԿ-ի նախագահ, ֆինանսական փորձագետ, տ.գ.թ. Սողոմոն Միրզոյանը։

Առաջին դասը վարեց Միհրան Թադևոսյանը, որը նվիրված էր «Բիզնեսի էությունը և տնտեսագիտական բովանդակությունը» թեմային։ Դասի ընթացքում մասնակիցները ծանոթացան բիզնեսի հիմնական սկզբունքներին, տնտեսական համակարգերի տեսակներին, բիզնես գործունեության ձևերին ու դրանց դասակարգմանը, ինչպես նաև այն տարածված բացթողումներին, որոնք հաճախ իրականացվում են սկսնակ ձեռներեցների կողմից։


Ծրագրի առաջիկա դասերի ընթացքում մասնակիցներին կներկայացվեն բիզնեսի գրանցման կարգը, օրենսդրական դաշտի առանձնահատկությունները, բիզնեսի պլանավորման ու ֆինանսական կառավարման հիմնական մոտեցումները, գնագոյացման ու հարկային համակարգի կառուցվածքը, ինչպես նաև կապիտալի ներգրավման և շուկայում դիրքավորման արդյունավետ ուղիները։

Հիշեցնենք, որ ծրագիրն իրականացվում է Աշխատանքի միջազգային կազմակերպության (ԱՄԿ) աջակցությամբ՝ «ԱՄԿ լիազոր գործընկերների կարողությունների զարգացում՝ աշխատանքի ոչ ֆորմալ դրսևորումների կանխման և ֆորմալացման անցման խթանման ուղղությամբ, փախստականների հետ կապված ճգնաժամի համատեքստում» նախաձեռնության շրջանակներում։