Միության անդամներին ներկայացվեց ԱԸՊ համակարգի ներդրումը հայաստանում

Հայաստանի գործատուների հանրապետական միության և Հայաստանի ամերիկյան համալսարանի Յակոբեան բնապահպանական կենտրոնի համատեղ նախաձեռնությամբ մայիսի 15-ին կայացավ հանդիպում՝ նվիրված Արտադրողի ընդլայնված պատասխանատվության (ԱԸՊ) համակարգի ներդրմանը Հայաստանում։

Հանդիպման նպատակն էր Միության անդամներին ներկայացնել 2027 թվականից ուժի մեջ մտնող «Արտադրողի ընդլայնված պատասխանատվության մասին» ՀՀ օրենքի նախագիծը, որի նպատակը թափոնների պատշաճ ու անվտանգ կառավարման համակարգերի ստեղծումն է ու դրանց արդյունավետ գործունեության ապահովումը:

Ըստ օրինագծի՝ բոլոր արտադրողներն ու ներմուծողները պետք է պատասխանատվություն կրեն իրենց արտադրանքի կյանքի ամբողջ ցիկլի համար՝
https://www.e-draft.am/projects/8867

Որպես ոլորտային փորձագետներ՝ հանդիպման շրջանակում թեմայի վերաբերյալ մասնագիտական ներկայացմամբ հանդես եկան IMC Armenia-ի գործադիր տնօրեն, ՀՀ-ում թափոնների կառավարման ծրագրերի խորհրդատու Սիլվա Մեսրոպյանը և ՀԱՀ դասախոս, թափոնների կառավարման փորձագետ Հարություն Ալպետյանը։

Քննարկման ընթացքում մասնակիցներին ներկայացվեցին ԱԸՊ օրենսդրական նախագծի հիմնական դրույթները, դրա հնարավոր ազդեցությունները բիզնես միջավայրի վրա, ինչպես նաև այն գործնական քայլերը, որոնք անհրաժեշտ է ձեռնարկել նոր կարգավորումներին համապատասխանելու համար։ Օրակարգային թեմաների շրջանակում անդրադարձ կատարվեց նաև արտադրողի պատասխանատվության կազմակերպությունների (ԱՊԿ) ստեղծման և գործառույթների հարցերին, ինչպես նաև պետական և մասնավոր հատվածների միջև արդյունավետ համագործակցության կարևորությանը։

Հանդիպումը նպաստեց բիզնես համայնքի ներկայացուցիչների, ոլորտային մասնագետների և շահագրգիռ կողմերի միջև արդյունավետ երկխոսության, փորձի փոխանակման և առաջիկա փոփոխությունների շուրջ քննարկումների ձևավորմանը։ Մասնակիցները կարևորեցին նման ձևաչափով քննարկումների շարունակականությունը՝ ընդգծելով, որ նոր համակարգի արդյունավետ ներդրման համար անհրաժեշտ է պետություն-մասնավոր հատված սերտ համագործակցություն և իրազեկվածության բարձր մակարդակ։