Միության անդամը` մաքսային կարգավորումների հստակեցման վերաբերյալ

Սեպտեմբերի 29-ին տեղի ունեցավ ՊԵԿ նախագահին կից հասարակական խորհրդի նիստը, որի ընթացքում քննարկվեցին մաքսային ոլորտի օրենսդրական կարգավորումների բարելավմանն ուղղված նախագծեր։

Նիստի ընթացքում անդրադարձ կատարվեց ապրանքների դասակարգման որոշումների կիրառմանը, ժամանակավոր պահպանման վայրերից դուրս պահպանության դեպքերի ընդլայնմանը, «Հրաժարում՝ հօգուտ պետության», «Մաքսային պահեստ» և վերամշակումներին վերաբերող մաքսային ընթացակարգերի կիրառմանն ու թույլտվությունների ստացմանը, մտավոր սեփականության օբյեկտների՝ մաքսային մարմինների նախաձեռնությամբ պաշտպանությանը, մաքսային հայտարարագրերի լրացման ընթացքում թույլ տված անճշտությունների մասով պատասխանատվությանը, ինչպես նաև նախագծերով առաջարկվող այլ կարգավորումներին։

Օրակարգի շրջանակում քննարկվեցին նաև վերստուգում նշանակելու դեպքում նախորդ ստուգման կամ վերստուգման արդյունքներով կայացված վարչական ակտի գործողության կասեցման և դրա հետ կապված իրավական կարգավորումների վերաբերյալ ներկայացված առաջարկն ու այլ ընթացիկ հարցեր։

Նիստի ընթացքում Հայաստանի գործատուների հանրապետական միության անդամ Սերգեյ Ներսեսյանը բարձրացրեց նաև օդային ճանապարհով ԵԱՏՄ անդամ պետություններից ապրանքների ներմուծման դեպքում ԱԱՀ-ի հաշվարկման համար կիրառվող փոխարժեքի վերաբերյալ հարցը։ Նա առաջարկեց իրազեկման թերթիկում առավել հստակեցնել ՊԵԿ-ի դիրքորոշումը՝ մասնավորապես նշելով, թե որ դեպքերում է «հաշվարկային փաստաթուղթ» հասկացությունը կիրառվում ՀՀ հարկային օրենսգրքի 55-րդ հոդվածի 2-րդ մասով սահմանված փաստաթղթերի նկատմամբ, ինչպես նաև օդային բեռնափոխադրումների դեպքում՝ որ ամսաթիվն է հիմք ընդունվում արտարժույթով արտահայտված գործարքի համար փոխարժեքը որոշելիս։

Քննարկման արդյունքում հարցի վերաբերյալ ՊԵԿ-ի դիրքորոշումն առավել հստակ կարտացոլվի իրազեկման թերթիկում։