Միության նախագահը մասնակցեց Հակակոռուպցիոն քաղաքականության խորհրդի նիստին

Նոյեմբերի 28-ին ՀՀ վարչապետ Նիկոլ Փաշինյանի գլխավորությամբ ՀՀ կառավարությունում տեղի ունեցավ Հակակոռուպցիոն քաղաքականության խորհրդի նոր կազմով առաջին նիստը։

Նիստին մասնակցեց նաև Հայաստանի գործատուների հանրապետական միության նախագահ Վահագն Համբարձումյանը, ով 2025թ.-ի նոյեմբերի 20-ից հանդիսանում է Հակակոռուպցիոն քաղաքականության խորհրդի անդամ։

Քննարկվեցին կուսակցությունների ֆինանսավորման ոլորտում առկա օրենսդրական լուծումները, կուսակցություններին տրամադրվող նպատակային ֆինանսավորման չափորոշիչներն ու հիմնավորումները, ինչպես նաև կուսակցությունների ֆինանսական գործունեության թափանցիկության նկատմամբ վերահսկողական գործառույթների և մեխանիզմների հստակեցումները։

Օրակարգի երկրորդ հարցի շրջանակում ներկայացվել են ՏՀԶԿ-ի գնահատման 5-րդ փուլի շրջանակներում կատարողականի գնահատման չափանիշներն ու արձանագրված առաջընթացը հակակոռուպցիոն քաղաքականության, շահերի բախման ու հայտարարագրման, ազդարարների պաշտպանության, գործարար բարեվարքության, դատական համակարգի անկախության, դատախազական համակարգի անկախության, հակակոռուպցիոն մարմինների և կոռուպցիոն հանցագործությունների քննության ուղղությամբ:

Զեկուցվել է նաև ԳՐԵԿՈ-ի Հայաստանի գնահատման 5-րդ փուլի շրջանակներում առկա հանձնառությունների ուղղությամբ տարվող աշխատանքների վերաբերյալ:

Զեկույցների վերաբերյալ խորհրդի անդամները ներկայացրել են իրենց դիտարկումներն առաջարկվող լուծումների վերաբերյալ, մտքեր են փոխանակվել հանձնառությունների կատարման ընթացակարգերի շուրջ:

Ամփոփելով՝ վարչապետ Փաշինյանը հանձնարարել է զեկույցների ընթացքում վեր հանված խնդիրների ուղղությամբ շարունակել աշխատանքները և հաջորդ նիստին ներկայացնել կոնկրետ առաջարկություններ: