Նույնականացման միջոցներով դրոշմավորման փորձնական ծրագրերի շրջանակում քննարկվեցին տնտեսավարողների գործնական խնդիրները

18-11-2026
Նույնականացման միջոցներով դրոշմավորման փորձնական ծրագրերի շրջանակում քննարկվեցին տնտեսավարողների գործնական խնդիրները

Նոյեմբերի 17-ին Պետական եկամուտների կոմիտեի նախագահի տեղակալ Վրեժ Մխիթարյանի գլխավորությամբ տեղի ունեցավ ՊԵԿ նախագահին կից հասարակական խորհրդի արտահերթ նիստը, որի օրակարգի հիմնական հարցը որոշ ապրանքային խմբերի նույնականացման միջոցներով դրոշմավորման փորձնական ծրագրերի քննարկումն էր։

Նիստի ընթացքում քննարկվեցին ՀՀ կառավարության՝ 2026 թվականի հոկտեմբերի 29-ի մի շարք որոշումներով հաստատված փորձնական ծրագրերը, որոնց նպատակն էր գնահատել ապրանքների նույնականացման միջոցներով դրոշմավորման մեխանիզմների կիրառելիությունը, փորձարկել տեղեկատվական համակարգի աշխատանքը և կատարելագործել ապրանքների հետագծելիության ու վերահսկողության գործընթացները։ Ներկայացվեցին նաև փորձնական ծրագրերում ընդգրկված հիմնական ապրանքախմբերը։

Քննարկման ընթացքում պետություն–մասնավոր հատված երկխոսության շրջանակում վեր հանվեցին փորձնական ծրագրերի իրականացման ընթացքում տնտեսավարողների կողմից բարձրացված հարցերն ու գործնական խնդիրները, ինչպես նաև դրանց լուծման հնարավոր տարբերակները։

Նիստին մասնակցող Հայաստանի գործատուների հանրապետական միության ներկայացուցիչ Սերգեյ Ներսեսյանը ներկայացրեց մի շարք առաջարկություններ և դիտարկումներ։ Մասնավորապես, նա անդրադարձավ օգտագործված անվադողերի և ավտոպահեստամասերի առանձին բաղադրիչների առքուվաճառքով զբաղվող տնտեսավարողների գործունեությանը և ընդգծեց, որ այդ ապրանքների ձեռքբերման և հետագա վաճառքի գների տարբերությունը, ինչպես նաև դրանց իրացման առանձնահատկությունները լրացուցիչ դժվարություններ են առաջացնում նույնականացման միջոցներով դրոշմավորման գործընթացում։ Այս համատեքստում առաջարկվեց փորձնական ծրագրերում ներգրավել նաև համապատասխան ոլորտի հարկ վճարողներին՝ գործնականում գնահատելու մեխանիզմի կիրառելիությունը և բացահայտելու հնարավոր խնդիրները։

Քննարկման արդյունքում կարևորվեց նաև ՀԳՀՄ-ի աջակցությունը՝ տնտեսավարողների շրջանում փորձնական ծրագրերի վերաբերյալ իրազեկվածության բարձրացման և դրանց  մասնակցության խրախուսման ուղղությամբ` դրոշմավորման գործընթացում արձանագրված հարցերն ու դժվարությունները ՊԵԿ-ին ներկայացնելու և  համապատասխան լուծումների մշակմանն աջակցելու նպատակով։

Նշվեց, որ փորձնական ծրագրերի ավարտից հետո ՊԵԿ-ը կամփոփի դրանց գնահատման արդյունքները և տասնօրյա ժամկետում կներկայացնի ՀՀ կառավարություն՝ հետագա որոշումների կայացման նպատակով։

Այլ նորություններ #tag-ով

ՎԵՐՋԻՆ ՆՈՐՈՒԹՅՈՒՆՆԵՐԸ