Մասնագիտական աշխատանքային քննարկումներ Եկամուտների վարչարարության բարեփոխումների հասարակական խորհրդի նիստում

ՊԵԿ նախագահ Էդուարդ Հակոբյանի նախագահությամբ մարտի 26-ին տեղի ունեցավ Եկամուտների վարչարարության բարեփոխումների հասարակական խորհրդի հերթական նիստը` պետություն-քաղաքացիական հասարակություն արդյունավետ երկխոսության ապահովման նպատակով։

Նիստին մասնակցում էին ՊԵԿ նախագահի տեղակալները, կառուցվածքային ստորաբաժանումների ղեկավարներ և մասնագետներ, խորհրդի կազմում ընդգրկված պետական, հասարակական և այլ կազմակերպությունների ներկայացուցիչներ:

ՊԵԿ նախագահ Էդուարդ Հակոբյանը կարևորեց հանրային, ինչպես նաև բիզնես ոլորտի ներկայացուցիչների կարծիքը՝ հասարակության լայն շրջանակում քննարկվող կարգավորումների վերաբերյալ:

Ներկայացվեցին Կոմիտեի կողմից իրականացված աշխատանքները, մասնավորապես, անդրադարձ կատարվեց հանրության շրջանում իրականացվող լայնածավալ իրազեկման միջոցառումներին, ֆիզիկական անձանց եկամուտների հայտարարագրման ժամկետներին, հայտարարագրի ներկայացման հարթակների առավել մատչելի դարձնելուն ուղղված աշխատանքներին՝ թվայնացման տեսանկյունից։ Քննարկվեցին նաև առևտրական (առք ու վաճառքի) գործունեություն իրականացնող շրջանառության հարկ վճարողների աջակցության ծրագրին վերաբերող հարցեր՝ կարևորելով աջակցության հասցեական տրամադրումը։

Անդրադառնալով հարկային և մաքսային ոլորտներում իրականացվող վարչարարությանը՝ խորհրդի անդամների կողմից բարձրացված խնդիրների և մտահոգությունների շարքում էին՝ ապրանքների ներմուծման կամ արտադրման դեպքում թվային դրոշմավորման, ԵՏՄ անդամ պետությունների միջև ապրանքների փոխճանաչելիության, ինչպես նաև ՀԴՄ կիրառման կանոնների խախտման դեպքում առաջացած տուգանքների և ՊԵԿ կողմից ստացվող ծանուցումների հետ կապված հարցերը։ Ներկայացված հարցերի շուրջ Խորհրդի անդամները հանդես եկան կառուցողական առաջարկներով և դիտարկումներով։

Նիստին մասնակից Հայաստանի գործատուների հանրապետական միության նախագահ Վահագն Համբարձումյանը նույնպես հայտնեց իր մտահոգություններն օրակարգային հարցերի շուրջ` հանդես գալով մի շարք առաջարկներով և դիտարկումներով ֆիզիկական անձանց եկամուտների համընդհանուր հայտարարագրման համակարգի, շրջանառության հարկ վճարողների աջակցության կարգավորումների, հարկային և մաքսային վարչարարությանն առնչվող հարցերի վերաբերյալ:

Ամփոփելով նիստը` ՊԵԿ նախագահը նշեց, որ երկխոսության արդյունքում ներկայացված դիտարկումներն ու առաջարկները խորքային կուսումնասիրվեն, ինչպես նաև բարձրացված հարցերին արդյունավետ լուծումներ տալու նպատակով` հասարակական խորհրդի անդամների հետ համատեղ կկազմակերպվեն մասնագիտական աշխատանքային քննարկումներ: