Քննարկվեց հարկային համակարգի փոփոխությունների հայեցակարգի նախագիծը

Հոկտեմբերի 8-ին ՀՀ ֆինանսների նախարար Վահե Հովհաննիսյանի նախագահությամբ տեղի ունեցավ նախարարին կից հասարակական խորհրդի երրորդ նիստը, որին մասնակցում էին նախարարի տեղակալներ Համլետ Սահակյանը, Վահան Սիրունյանը, խորհրդի անդամ հասարակական կազմակերպությունների, միությունների և ասոցիացիաների ներկայացուցիչներ: Նախարարը ողջունեց հանդիպման մասնակիցներին` կարևորելով վերջիններիս ակտիվ ներգրավվածությունը ոլորտային քաղաքականությունների նախագծման և մշակման գործընթացում:

Անդրադառնալով օրակարգային հարցին` նախարարի տեղակալ Համլետ Սահակյանը ներկայացրեց հարկային նոր հայեցակարգը և համակարգի արդիականացման ու արդյունավետության բարձրացման ուղղությունները, մասնավորապես, անդրադարձ կատարվեց հարկային քաղաքականության հասցեականությանը, եկամուտների հայտարարագրմանը և սոցիալական ծախսերի լուծումներին, համայնքների հարկային եկամուտների հնարավորությունների ընդլայնմանը, հաշվապահական և հարկային հաշվառման աստիճանական մոտարկմանը:

Խորհրդի անդամները բարձրաձայնեցին իրենց հուզող հարցերը և քննարկեցին նախագծի վերաբերյալ առաջարկությունների առնչությամբ դեռևս պարզաբանման կարիք ունեցող խնդիրները: Մասնավորապես, Հայաստանի գործատուների հանրապետական միության անդամ կազմակերպության ներկայացուցիչ Սերգեյ Ներսեսյանը ներկայացրեց ՀԳՀՄ դիրքորոշումը հարկային նոր հայեցակարգի շրջանակում` առաջարկելով վերանայել միկրոձեռնարկատիրության հարկման շեմի բարձրացման մոտեցումը՝ հաշվի առնելով պետական եկամուտների պահպանման, հարկային հաշվառման մշակույթի շարունակականության և հարկային արտոնությունների չարաշահման ռիսկերի նվազեցման անհրաժեշտությունը։ Միաժամանակ, համայնքային նոր հարկատեսակների սահմանումը պետք է հիմնված լինի ոլորտների զարգացման վրա դրանց ազդեցության գնահատման և համայնքների միջև եկամուտների անհամաչափ բաշխման կանխման մեխանիզմների վրա։

Նիստի ավարտին նախարարն ամփոփեց քննարկումների հիմնական արդյունքները, և պայմանավորվածություն ձեռք բերվեց առաջիկա նիստի օրակարգի և բովանդակային հիմնական ուղղությունների վերաբերյալ: