Քննարկվեցին արդարադատության ոլորտի բարեփոխումները

Հունիսի 11-ին տեղի ունեցավ Արդարադատության նախարարին կից հասարակական խորհրդի հերթական նիստը, որը վարեց Արդարադատության նախարարի տեղակալ Գևորգ Քոչարյանը։

Նիստի ընթացքում քննարկվեցին Կառավարության 2026-2031 թվականների ծրագրով Արդարադատության նախարարության կողմից նախատեսված միջոցառումները և ոլորտային բարեփոխումների հիմնական ուղղությունները։

Նախարարի տեղակալը ներկայացրեց, մասնավորապես, քրեակատարողական և պրոբացիայի ոլորտներում նախատեսվող բարեփոխումները՝ անդրադառնալով դրանց հիմնական ուղղություններին և ակնկալվող արդյունքներին։ Քննարկվեց նաև փորձաքննությունների իրականացման համակարգի բարեփոխման հարցը, որի շրջանակում նախատեսվում է օրենսդրական կարգավորումների միջոցով հստակեցնել փորձաքննությունների իրականացման ժամկետները։ Հանդիպման ընթացքում կողմերը մտքեր փոխանակեցին ներկայացված բարեփոխումների վերաբերյալ։

Հայաստանի գործատուների հանրապետական միությունից նիստին մասնակցեց ՀԳՀՄ խորհրդի անդամ Արթուր Հովհաննիսյանը, ով, մասնավորապես, անդրադարձավ փորձաքննությունների սահմանված ժամկետներին և լուծումներին, որոնք նախատեսվում են գործընթացի արդյունավետությունն ու կանխատեսելիությունն ապահովելու նպատակով` ընդգծելով, որ դրանց երկարատև ընթացքը կարող է հանգեցնել դատական գործերի ձգձգման։ Տեղեկացվեց, որ նախատեսվող կարգավորումների մշակմանը նախորդելու է համապատասխան ուսումնասիրություն, որի արդյունքների հիման վրա էլ կսահմանվեն հետագա քայլերը։

Քննարկումների այս փուլը կշարունակվի նաև հաջորդ նիստերի ընթացքում՝ օրակարգում ներառված ուղղություններն առավել մանրամասն ներկայացնելու և քննարկելու նպատակով։