Քննարկվեցին ենթակառուցվածքների և էներգետիկայի ոլորտի առաջնահերթությունները

Հուլիսի 30-ին կայացավ ՀՀ տարածքային կառավարման և ենթակառուցվածքների նախարարին կից հասարակական խորհրդի հերթական նիստը։ Նախարար Դավիթ Խուդաթյանը ողջունեց մասնակիցներին՝ մաղթելով կառուցողական քննարկում։

Նիստին մասնակցում էին հասարակական խորհրդի կազմում ընդգրկված կազմակերպությունների ներկայացուցիչներ և ոլորտային փորձագետներ։ Հայաստանի գործատուների հանրապետական միությունը ներկայացնում էին Նունիկ Մանուկյանը և Ռուբեն Հակոբյանը։

Նիստի ընթացքում զեկույցներ ներկայացվեցին «Ասբեստից տանիքների փոխարինման «Առողջ տանիք» ծրագրի» նախագծի, էներգետիկայի, մասնավորապես՝ վերականգնվող էներգետիկայի եւ էներգախնայողության բնագավառներում իրականացվող աշխատանքների և զարգացման հեռանկարների, ինչպես նաև հանրապետության տարածքում աղբահանության ինտեգրված համակարգի ներդրման և ընթացիկ վիճակի վերաբերյալ։

Ի թիվս օրակարգային հարցերի՝ Միության ներկայացուցիչ Նունիկ Մանուկյանը ներկայացրեց դիտարկումներ այն պահանջի վերաբերյալ, համաձայն որի՝ տրանսպորտային միջոցների տեխնիկական զննության ծառայություններ մատուցող կազմակերպություններից ՀՀ տարածքային կառավարման և ենթակառուցվածքների նախարարությունը, ի լրումն Հանրային ծառայությունները կարգավորող հանձնաժողովի համապատասխան որոշմամբ սահմանված հաշվետվությունների, պահանջում է ներկայացնել նաև ֆինանսական հաշվետվությունների փաթեթ։ Այսօրվա գործող կարգավորումներով իրավական ակտի պահանջը չի նախատեսում, որ թե՛ կազմակերպությունը, թե՛ ԱՁ-ն պետք է ֆինանսական հաշվետվություններ ներկայացնի: Ն. Մանուկյանն առաջարկեց այդ պահանջը տնտեսավարող սուբյեկտների համար հանել, կամ եթե իրավական ակտում փոփոխությամբ կնախատեսվի ֆինանսական հաշվետվություններ ներկայացնելու պահանջը, նկատի ունենալ, որ ԱՁ-ները նման հաշվառում չեն վարում, թե՛ հաշվապահական հաշվառման մասին օրենքի համաձայն, և թե՛ ԱՁ-ների մասին օրենքի համաձայն։ Նախարարը դրական գնահատեց ներկայացված առաջարկը և տեղեկացրեց, որ այն կընդգրկվի հասարակական խորհրդի հաջորդ նիստի օրակարգում։

Նիստի ավարտին պայմանավորվածություն ձեռք բերվեց աշխատանքներն առավել համակարգված իրականացնելու նպատակով ձևավորել ոլորտային աշխատանքային խմբեր։