Քննարկվեցին ԼՂ-ից տեղահանված բնակչության մասնագիտական զարգացման և սոցիալ–տնտեսական ինտեգրմանն ուղղված ծրագրային ուղղությունները

Հուլիսի 24-ին տեղի ունեցավ հանդիպում Հայաստանի գործատուների հանրապետական միության գործադիր տնօրեն Լիլիթ Ադամյանի և ՄԱԿ-ի Փախստականների գործակալության ներկայացուցիչների միջև` ի դեմս զարգացման հարցերով ավագ ղեկավար Էլենա Ֆերարիի, կենսապայմանների և տնտեսական ներգրավման հարցերով պատասխանատու Արմէն Տիրատուրեանի։ Հիշեցնենք, որ ՄԱԿ ՓԳՀ-ի մանդատն է առաջնորդել և համակարգել աշխարհում փախստականների պաշտպանությունը և նրանց խնդիրների լուծմանն ուղղված միջազգային ջանքերը: 

Հանդիպման նպատակն էր վերհանել Լեռնային Ղարաբաղից տեղահանված բնակչության առկա սոցիալ–տնտեսական կարիքները և դրանց հիման վրա նախաձեռնել ծրագրեր, որոնք կապահովեն նրանց տնտեսական բարեկեցությունը և կբարելավեն կյանքի որակի սոցիալական ինտեգրման խթանման միջոցով։

ՀԳՀՄ գործադիր տնօրեն Լիլիթ Ադամյանը ներկայացրեց ՀԳՀՄ–ի կողմից իրականացվող ծրագիրը` միտված  Լեռնային Ղարաբաղից բռնի տեղահանված բնակչության գործարար հմտությունների զարգացմանը, տնտեսական ներառականության ապահոհավմանն ու սոցիալ–տնտեսական ինտեգրմանը։ Լ.Ադամյանը տեղեկացրեց, որ ծրագրի շրջանակներում ավարտվել են առաջին խմբի դասընթացը, որի արդյունքում մասնակիցներից շատերն արդեն ներկայացրել են սեփական բիզնես նախաձեռնությունների նախագծերը։

Համատեղ քննարկվեցին նաև այն ծրագրերը, որոնց միջոցով հնարավոր կլինի աջակցել մասնակիցներին և խթանել նրանց ձեռնարկատիրական նախագծերի ֆինանսավորումը՝ նպաստելով գաղափարների իրագործմանը գործնականում։

Քննարկման առանցքում էին նաև այնպիսի նախաձեռնությունները, որոնք կնպաստեն փախստականների կարողությունների, հմտությունների և մասնագիտական ներուժի զարգացմանը՝ ապահովելով նրանց լիարժեք ներառումն ու ինտեգրումը աշխատաշուկա։

Լ.Ադամյանը ներկայացրեց մի շարք ոլորտներ և մասնագիտություններ, որոնք հատկապես պահանջված են ժամանակակից աշխատաշուկայում։ Մասնավորապես, ընդգծվեց մարդկային ռեսուրսների կառավարման, մարքեթինգի, ֆինանսական գրագիտության, գործարար հաղորդակցության, հաճախորդների սպասարկման ոլորտները։ Լ.Ադամյանն առաջարկեց ծրագրի առաջին փուլն ուղղել հենց այս կարողությունների զարգացմանը՝ նպատակ ունենալով մի կողմից աջակցել փախստականների մասնագիտական առաջընթացին, մյուս կողմից՝ նպաստել աշխատաշուկայում առկա մասնագետների պակասի լրացմանը։

Քննարկման արդյունքում պայմանավորվածություն ձեռք բերվեց շարունակել հանդիպումների շարքը՝ առաջիկայում անցնելով առավել առարկայական փուլ համատեղ ծրագրերի ձևավորման և իրականացման ուղղությամբ։