Քննարկվել է աշխատաժամանակի կրճատման վերաբերյալ օրենսդրական նախաձեռնությունը

Մարտի 3-ին ՀՀ ԱԺ աշխատանքի և սոցիալական հարցերի մշտական հանձնաժողովի նախագահ Հերիքնազ Տիգրանյանի նախաձեռնությամբ ՀՀ ԱԺ պատգամավորների, ՀՀ աշխատանքի և սոցիալական հարցերի նախարար Նարեկ Մկրտչյանի, Հայաստանի գործատուների հանրապետական միության նախագահ Վահագն Համբարձումյանի, Հայաստանի արհմիությունների կոնֆեդերացիայի ներկայացուցիչների մասնակցությամբ տեղի ունեցավ քննարկում օրական աշխատաժամանակը մեկ ժամով կրճատելու վերաբերյալ օրենքի նախագծի շուրջ։

ՀՀ ԱՍՀ մշտական հանձնաժողովի նախագահ Հերիքնազ Տիգրանյանը կարևորեց սոցիալական գործընկեր կառույցների հետ կառուցողական քննարկումը, որը հնարավորություն է տալիս լսելու իրարամերժ կարծիքներ և քննարկման արդյունքում բարելավել օրենքի նախագիծը, որը դրվել է հանրային քննարկման, սակայն դեռ Ազգային ժողովի քննարկմանը չի ներկայացվել։

ՀՀ աշխատանքի և սոցիալական հարցերի նախարար Նարեկ Մկրտչյանը նշեց, որ նախագծի նպատակն աշխատողների արտադրողականության, աշխատունակության բարձրացումն է, աշխատանքային օրվա կտրվածքով ընտանիք-աշխատանք հարաբերակցության հավասարակշիռ բալանսավորումն է։

Միջազգային փորձի օրինակներով գործադիր մարմնի ներկայացուցիչները ներկայացրին կոնկրետ երկրների հաջողված փորձի հիման վրա հաստատված վիճակագրական և հետազոտական տվյալները, որոնք փաստում են, որ աշխատաժամանակի կրճատումը դրականորեն է ազդում աշխատողների ֆիզիկական և հոգեկան առողջության և արտադրողականության վրա։

Հայաստանի գործատուների հանրապետական միության նախագահ Վահագն Համբարձումյանը և ACSES վերլուծական կենտրոնի տնօրեն Հայկազ Ֆանյանը հիմնավորված չհամարեցին վերոնշյալ պնդումները՝ ներկայացնելով որոշ հետազոտական տվյալներ և առաջարկներ:

Վահագն Համբարձումյանն արտահայտեց միությանն անդամակցող գործատուների հավաքական և փաստահեն բացասական դիրքորոշումը՝ հիմքում ունենալով տնտեսության և գործատուների վրա հնարավոր բացասական ազդեցությունը։

Վ.Համբարձումյանն առաջարկեց կամընտրության հնարավորություն տալ` թողնելով աշխատաժամանակի կարգավորումը որոշ մասնավոր հատվածի գործատուների հայեցողությանը` դրանով իսկ ապահովելով մրցակցությունն ու որոշ մասնագիտությունների գրավչությունը։