Ստորագրվեց համագործակցության հուշագիր Միության և UCOM-ի միջև

Նոյեմբերի 2-ին Հայաստանի գործատուների հանրապետական միության և UCOM ընկերության միջև ստորագրվեց համագործակցության հուշագիր` ի դեմս ՀԳՀՄ նախագահ Վահագն Համբարձումյանի և UCOM-ի գլխավոր տնօրեն Ռալֆ Յիրիկյանի։

Կողմերը կարևորեցին գործընկերության դերը կայուն և մրցունակ ձեռնարկատիրության զարգացման, գործատուների մրցունակության բարձրացման և նրանց շահերի պաշտպանության գործում։

UCOM-ի անդամակցությունը Միությանը և երկկողմ համագործակցությունը հիմք են ստեղծում գործարար հատվածի կարիքներին միտված համատեղ նախաձեռնությունների իրականացման համար՝ միավորելով Միության գործատուների շահերի պաշտպանության, նրանց խնդիրների բարձրաձայնման և պետական կառույցների հետ երկխոսության խթանման փորձը UCOM-ի կորպորատիվ կառավարման փորձի և տեխնոլոգիական ու թվային լուծումների ներուժի հետ։

Համագործակցության առանցքային ուղղություններից են նաև բիզնեսի թվային փոխակերպումը, տեխնոլոգիական նորարարությունների ներդրումը, մարդկային կապիտալի զարգացումը, երիտասարդների թվային հմտությունների կատարելագործումը և կրթություն-աշխատաշուկա կապի ամրապնդումը։

Անդրադառնալով երկկողմ համագործակցության նշանակությանը` Միության նախագահ Վահագն Համբարձումյանն ընդգծեց, որ այն փոխադարձ արժեք կստեղծի՝ նպաստելով ինչպես UCOM-ի շահերի ներկայացմանը պետություն–մասնավոր հատված երկխոսության հարթակներում և ոլորտային քննարկումներում, այնպես էլ գործարար համայնքի հետ փոխգործակցությանը՝ հնարավորություն ստեղծելով բացահայտել բիզնեսի կարիքներն ու զարգացման առաջնահերթությունները, ինչպես նաև ընկերության տեխնոլոգիական և թվային լուծումները ներկայացնելու գործարար շրջանակներին։ Միության նախագահը շեշտեց, որ առանձնահատուկ ուշադրություն կդարձվի նաև կրթական հաստատությունների հետ համագործակցության զարգացմանը՝ աշխատանքի վրա հիմնված ուսուցման խթանման, երիտասարդների գործնական և թվային հմտությունների կատարելագործման ու կրթական ծրագրերը աշխատաշուկայի ժամանակակից պահանջներին ներդաշնակեցնելու ուղղությամբ։

UCOM ընկերության գլխավոր տնօրեն Ռալֆ Յիրիկյանը կարևորեց Միության հետ համագործակցության զարգացումը՝ նշելով, որ ընկերությունը պատրաստ է իր տեխնոլոգիական փորձն ու հնարավորություններն ուղղել գործատուների իրական կարիքներին համապատասխան լուծումների մշակմանն ու կրթության և բիզնեսի միջև կապի ամրապնդմանը։

Համագործակցության շրջանակում նախատեսվում է փորձի փոխանակում, համատեղ սեմինարների, տեղեկատվական հանդիպումների և գործարար քննարկումների կազմակերպում, ինչպես նաև երիտասարդների կրթության, թվային հմտությունների զարգացման և մասնագիտական կողմնորոշմանն ուղղված նախաձեռնությունների իրականացում։

Այսպիսով, ՀԳՀՄ-ի և UCOM-ի համագործակցությունը միտված է ամրապնդելու բիզնես–տեխնոլոգիա–կրթություն համագործակցությունը՝ նպաստելով Հայաստանի գործարար միջավայրի արդիականացմանը, մարդկային կապիտալի զարգացմանը և Հայաստանի տնտեսության կայուն ու մրցունակ զարգացմանը։

https://www.youtube.com/watch?v=j1vGkl1LEBE

https://abnews.am/post/a-memorandum-of-cooperation-has-been-signed

http://ucom.am/news/ucom-and-republican-union-of-employers-of-armenia-sign-cooperation-memorandum