Տեղի ունեցավ ՀԳՀՄ Խորհրդի 2025թ. 1-ին հերթական նիստը

Փետրվարի 15-ին տեղի ունեցավ Հայաստանի գործատուների հանրապետական միության (ՀԳՀՄ) Խորհրդի 2025թ.-ի առաջին հերթական նիստը։

Նիստին առկա ձևաչափով մասնակցում էին ՀԳՀՄ Խորհրդի 18 անդամներից 13-ը։

ՀԳՀՄ նախագահը Խորհրդի անդամներին ներկայացրեց ՀԳՀՄ թիմի կողմից տարբեր ուղղություններով իրականացրած աշխատանքները, այդ թվում նաև` նախօրեին «Հայաստանի հանքագործների և մետալուրգների գործատուների ճյուղային միություն» գործատուների միության ՀԳՀՄ-ին անդամակցման նպատակով համատեղ նախաձեռնած քննարկման արդյունքները:

Վահագն Համբարձումյանը տեղեկացրեց, որ Հայաստանի գործատուների հանրապետական միությունը շարունակում է համալրվել բարձր հեղինակություն ունեցող անդամներով` ներկայացնելով ՀԳՀՄ անդամության համար դիմած նոր կազմակերպություններին`

1) «Հայաստանի հանքագործների և մետալուրգների գործատուների ճյուղային միություն» ԳՄ
2) «Լիգլ ըլայընս» ՍՊԸ
3) «Մադամ կանանց միավորում» ՀԿ
4) «Բեսթ լայֆ ԲԿ» ՍՊԸ
5) «Քայլտեք» ՓԲԸ
6) «Քիսթոուն» ՍՊԸ
7) «Հայ.Բիոնիկ.Հանդ» ՍՊԸ
8) «Իրամեդիքլ գրուպ» ՓԲԸ

«Լիգլ ըլայընս» ՍՊԸ-ի նախագահ Կարեն Զադոյանն ու «Մադամ կանանց միավորում» ՀԿ-ի նախագահ Տաթև Բեյբությանը Խորհրդի նիստին միացել էին առցանց ձևաչափով, ովքեր իրենց պատրաստակամությունը հայտնեցին ակտիվ ներգրավվելու ՀԳՀՄ տարբեր նախաձեռնություններում և իրենց ներդրումն ունենալու Միության առաքելություններից բխող գործողությունների իրականացման գործընթացում։

Անդրադառնալով օրակարգային մյուս հարցերին` Վահագն Համբարձումյանը ներկայացրեց «Գործատուների միության մասին» ՀՀ օրենքի նախագծի օրենսդրական բարեփոխումների ներկայիս ընթացքը, ինչպես նաև օրենքից բխող ՀԳՀՄ կանոնադրության փոփոխության և Հանրապետական Կոլեկտիվ Պայմանագրի դրույթների լրամշակման անհրաժեշտությունը։

Առանձին քննարկվեցին նաև ՀԳՀՄ անդամների ներգրավման ռազմավարությունը և ոլորտային հանձնախմբերով աշխատանքների կազմակերպումը` ուղղված Միության գործունեության արդյունավետության բարձրացմանը։

Հաշվի առնելով դիմող կազմակերպությունների բարձր հեղինակությունն ու արժեքաստեղծ գործունեությունը, ինչպես նաև ներկայացրած փաստաթղթերի արժանահավատությունը`
Վահագն Համբարձումյանը Խորհրդի կազմին առաջարկեց հաստատել նրանց անդամակցումը։

Ամփոփելով օրակարգային բոլոր հարցերը և միաձայն կողմ քվեարկելով` Խորհրդի նիստն ավարտեց իր աշխատանքները։