Տեղի ունեցավ ՀԳՀՄ Խորհրդի հերթական նիստը

Հուլիսի 12-ին տեղի ունեցավ Հայաստանի գործատուների հանրապետական միության (ՀԳՀՄ) Խորհրդի հերթական նիստը` առցանց ձևաչափով։

Նիստին մասնակցում էին ՀԳՀՄ Խորհրդի 20 անդամներից 16-ը։

Նիստի օրակարգային հարցերն էին`

1. ԵՄ–ՀՀ «Համապարփակ և Ընդլայնված Գործընկերության Համաձայնագրի» 366-րդ հոդվածով նախատեսված Քաղաքացիական Հասարակության Պլատֆորմի (ՔՀՊ) գործատու կազմակերպությունների հայաստանյան կազմի ձևավորման մրցույթի անցկացման կարգի հաստատում։
2. Քաղաքացիական Հասարակության Պլատֆորմի գործատու կազմակերպությունների հայաստանյան կազմի ձևավորման մրցույթի Ընտրական հանձնաժողովի կազմում Միության Խորհրդի անդամների ընտրություն և հաստատում։
3. Օրակարգային այլ հարցեր։

Նիստը վարում էր ՀԳՀՄ նախագահի տեղակալ Մարիա Խախամյանը՝ Միության կանոնադրության 11.17 կետի համաձայն, ըստ որի նախագահի բացակայության դեպքում վերջինիս հանձնարարությամբ նախագահի պարտականությունները կատարում է տեղակալը։

Օրակարգի առաջին հարցի շրջանակում ՀԳՀՄ գործադիր տնօրեն Լիլիթ Ադամյանը ներկայացրեց ԵՄ–ՀՀ «Համապարփակ և Ընդլայնված Գործընկերության Համաձայնագրի» 366-րդ հոդվածով նախատեսված Քաղաքացիական Հասարակության Պլատֆորմի գործատու կազմակերպությունների հայաստանյան կազմի ձևավորման մրցույթի անցկացման կարգի վերջնական լրամշակված տարբերակը։

Կարգի ընդհանուր դրույթներին ծանոթանալուց և քննարկումից հետո Խորհուրդը միաձայն հաստատեց մրցույթի կարգը, համաձայն որի առաջիկայում կհայտարարվի մրցույթ՝ ՀՀ-ԵՄ համաձայնագրի 366-րդ հոդվածով ստեղծված ՔՀՊ-ում գործատու կազմակերպությունների նոր թեկնածուների ներկայացման նպատակով։

Անդրադառնալով օրակարգի երկրորդ հարցին՝ ՀԳՀՄ նախագահի տեղակալ Մարիա Խախամյանը նշեց, որ մրցույթի կազմակերպման և անցկացման նպատակով անհրաժեշտ է Խորհրդի անդամներից ընտրել 4 թեկնածու Ընտրական հանձնաժողովի ձևավորման համար։ Նա տեղեկացրեց, որ ՀԳՀՄ նախագահ Վահագն Համբարձումյանն իր պատրաստակությունն է հայտնել ընդգրկվելու Ընտրական հանձնաժողովի կազմում։ Միաժամանակ Մ. Խախամյանը ևս ցանկություն հայտնեց ներառվելու Ընտրական հանձնաժողովի կազմում և առաջադրեց իր թեկնածությունը։ 

Կազմակերպվեց քննարկում, որի արդյունքում ՀԳՀՄ–ի կողմից ձևավորվեց Ընտրական հանձնաժողովի հետևյալ կազմը, որը Խորհուրդը հաստատեց միաձայն.
1. ՀԳՀՄ նախագահ Վահագն Համբարձումյան
2. ՀԳՀՄ նախագահի տեղակալ Մարիա Խախամյան
3. ՀԳՀՄ Խորհրդի անդամ Շավարշ Կարապետյան
4. ՀԳՀՄ Խորհրդի անդամ Աննա Ավետիսյան
Ընտրական հանձնաժողովի նախագահ ընտրվեց ՀԳՀՄ նախագահ Վահագն Համբարձումյանը, և որոշվեց, որ մրցույթի Քարտուղարի պարտականությունները կկատարի ՀԳՀՄ տնօրենի օգնական Լիլիթ Եգորյանը։

Միաձայն կողմ քվեարկելով օրակարգային բոլոր հարցերին` Խորհուրդն ավարտեց իր աշխատանքները։