Ժամանակի արդյունավետ կառավարման գործիքները ՀԳՀՄ անդամների կարողությունների հզորացման դասընթացի շրջանակներում

Շարունակվում են Հայաստանի գործատուների հանրապետական միության (ՀԳՀՄ) անդամների կարողությունների զարգացմանն ու հզորացմանն ուղղված դասընթացները։ Այս փուլում մասնակիցները ծանոթացան մարդկային ռեսուրսների կառավարման հիմունքներին, կոնֆլիկտների լուծման մեխանիզմներին, թիմային աշխատանքի կազմակերպման առանձնահատկություններին, ինչպես նաև ժամանակի արդյունավետ կառավարման գործիքակազմին։

Դասընթացների այս շարքը վարեց «Բի Էս Սի» (BSC) բիզնեսի աջակցման կենտրոնի փորձագետ Նունե Վարոսյանը, ով մասնակիցներին ծանոթացրեց ժամանակակից HR-ի զարգացման միտումներին՝ թվայնացումից և KPI համակարգերից մինչև աշխատակիցների ընտրության, ադապտացիայի և կատարողականի գնահատման մեթոդներ։ Մասնակիցները ծանոթացան նաև մոտիվացիայի դասական մոտեցումներին, կոնֆլիկտների ախտորոշման և զարգացման փուլերին, կառուցողական լուծումների կարևորությանը, ինչպես նաև փոխվստահության մթնոլորտի ձևավորման գործիքներին։

Դասընթացի երկրորդ հատվածում մասնակիցներն ուսումնասիրեցին թիմային աշխատանքի կազմակերպման առանձնահատկություններն ու համագործակցության մեխանիզմները՝ ուղղված միասնական նպատակների իրագործմանը։ Նունե Վարոսյանը ներկայացրեց ժամանակի արդյունավետ կառավարման եղանակները, ներառյալ` SMART նպատակադրման մոտեցումները, Eisenhower-ի մատրիցան, Պարետոյի 80/20 կանոնը և Պոմոդորո մեթոդը։

Հատուկ ուշադրություն դարձվեց ժամանակի պլանավորմանն ու ինքնակարգապահությանը՝ ընդգծելով, որ ժամանակը ինքնին չի կառավարվում, այլ մեր վերահսկողության ներքո են մեր գործողություններն ու վերաբերմունքը։ Զարգացնելով ճկուն պլանավորման հմտությունները և գիտակցաբար կազմակերպելով գործողությունները՝ մենք կարող ենք առավելագույն արդյունավետությամբ օգտագործել առկա ժամանակը, հասնել նշանակված նպատակներին և բարձրացնել մեր ընդհանուր արտադրողականությունը։

Դասընթացի ընթացքում տեսական հատվածը զուգակցվեց գործնական վարժությունների և քննարկումների հետ՝ հնարավորություն ընձեռելով մասնակիցներին ոչ միայն ձեռք բերել նոր գիտելիքներ, այլև կիրառել դրանք գործնականում։

Շնորհակալություն ենք հայտնում Նունե Վարոսյանին մասնագիտական փորձով կիսվելու և արժեքավոր գիտելիքներ փոխանցելու համար, ինչը մասնակիցներին հնարավորություն տվեց զարգացնել իրենց փափուկ հմտությունները և ձեռք բերել նոր գործիքներ, որոնք կօգնեն արդյունավետ իրականացնել աշխատանքային պարտականությունները և ամրապնդել կառավարչական, թիմային և գործարար կարողությունները։