Հայաստանում մեկնարկեց Աշխատանքի միջազգային կազմակերպության հերթական ազգային ծրագիրը

Սեպտեմբերի 25-ին ազդարարվեց Աշխատանքի միջազգային կազմակերպության նախաձեռնությամբ իրականացվող «Լեռնային Ղարաբաղից տեղահանված փախստականների ճգնաժամի համատեքստում ոչ ֆորմալ զբաղվածության կանխումը և ֆորմալ զբաղվածությանը անցնելու խթանումը» ծրագրի մեկնարկը, որին հրավիրված էր նաև Հայաստանի գործատուների հանրապետական միության գործադիր մարմինը` նախագահ Վահագն Համբարձումյանի գլխավորությամբ։

Բացման խոսքով հանդես եկավ ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը, ով կարևորեց ծրագրի իրականացումը ՀՀ–ում` ուղղված ոչ ֆորմալ զբաղվածության կանխարգելմանը և արժանապատիվ աշխատանքային պայմանների ապահովմանը։

Ողջույնի խոսքով հանդես եկան նաև Հայաստանի գործատուների հանրապետական միության նախագահ Վահագն Համբարձումյանը, Հայաստանի արհմիությունների կոնֆեդերացիայի նախագահ Էլեն Մանասերյանը, Հայաստանում ՄԱԿ–ի մշտական համակարգող Ֆրանսուազ Ժակոբը, ովքեր ընդգծեցին, որ արժանապատիվ աշխատանքի ստեղծումն ու սոցիալական արդարությունը մեր երկրի տնտեսության զարգացման առաջնահերթություններից  է, և պատրաստակամություն հայտնեցին միասնական ջանքերով նպաստել ծրագրի արդյունավետ իրականացման գործընթացին։

Հաջորդիվ մեկնարկեց պանելային քննարկում, որի ընթացքում մասնակիցները կիսվեցին Հայաստանի տնտեսության և ոչ ֆորմալ աշխատաշուկայի վերաբերյալ իրենց տեսակետներով, ինչպես նաև ներկայացրին իրենց փորձն ու ընթացիկ նախաձեռնությունները՝ ոչ ֆորմալ զբաղվածության և վերջինիս ֆորմալացման վերաբերյալ հարցերի շուրջ:

Քննարկման ընթացքում Աշխատանքի միջազգային կազմակերպության «Անցում ոչ ֆորմալից ֆորմալ տնտեսության» առաջնահերթության գործողությունների ծրագրի ղեկավար  Ֆրեդերիկ Լապեյրը և զբաղվածության հարցերով գլխավոր մասնագետ Կազուտոշի Չատանին հավաքագրեցին բոլոր դիտարկումներն ու առաջարկները համալիր միջոցառումների իրականացման և առաջիկա ռազմավարական ուղղությունների ուրվագծման նպատակով, որոնք կարող են նպաստել Հայաստանում ֆորմալ աշխատատեղերի ստեղծմանը և ֆորմալ տնտեսության զբաղվածության ապահովմանը։

Նշենք, որ ծրագրի շրջանակներում նախատեսվում է ստեղծել ոչ ֆորմալ տնտեսության հարցերով միջգերատեսչական աշխատանքային խումբ, որտեղ «ՀՀ կառավարություն  -  Հայաստանի գործատուների հանրապետական միություն - Հայաստանի արհմիությունների կոնֆեդերացիա» եռակողմ գործընկերության հարթակում համատեղ կմշակվեն համալիր միջոցառումներ ֆորմալ տնտեսության խթանման քաղաքականության մշակման և օրենսդրական բարեփոխումների ուղղությամբ։