Հայ–կանադական փոխգործակցության հնարավորությունների ընդլայնում

Հայաստանի գործատուների հանրապետական միության (ՀԳՀՄ) և Կանադայի հետ համագործակցության միջազգային կենտրոնի միջև գործընկերության շրջանակներում նոյեմբերի 20-ին տեղի ունեցավ առցանց սեմինար` «Միջազգային առևտրային գործարքներում Կանադայի օրենսդրության և հարկման հիմնական դրույթները» թեմայով։

ՀԳՀՄ նախագահ Վահագն Համբարձումյանի և Կանադայի հետ համագործակցության միջազգային կենտրոնի տնօրեն Վարդգես Ավագյանի համատեղ նախաձեռնությամբ սեմինարին մասնակցում էին նաև Միության անդամները` հնարավորություն ստեղծելով հետաքրքրված ձեռներեցներին ապահովել մանրամասն խորհրդատվությամբ Կանադայի հետ բիզնեսի և առևտրի զարգացման, ինչպես նաև նոր գործարար կապերի հաստատման ուղղությամբ։

Սեմինարը վարում էր առևտրի և հարկային իրավունքի ոլորտի առաջատար միջազգային փորձագետ, «Miller Thomson LLP»-ի (Տորոնտո, Կանադա) Վանկուվերի մասնաճյուղի կառավարիչ Դանիել Կիսելբախը, ով ներկայացրեց հայ–կանադական գործընկերության հաստատման, ինչպես նաև համատեղ ձեռնարկության և ռազմավարական համագործակցության զարգացման հնարավորությունները։

Սեմինարն ամփոփվեց ակտիվ հարցուպատասխանով, որի ընթացքում պարզաբանվեցին մի շարք հարցեր մասնակիցներին հետաքրքրող ոլորտներում ծառայությունների մատուցման ուղղությամբ Կանադայի օրենսդրության և հարկման առանձնահատկությունների վերաբերյալ։

ՀԳՀՄ նախագահ Վահագն Համբարձումյանը շնորհակալություն հայտնեց բանախոսին հագեցած սեմինարի համար և առաջարկեց հաջորդ հանդիպումն արդեն կազմակերպել երկկողմանի շահագրգռված ընկերությունների ներկայացուցիչների հետ` հայ–կանադական գործընկերության խթանման ուղղությամբ գործուն քայլերի իրագործման նպատակով։ Վահագն Համբարձումյանն ընդգծեց, որ Հայաստանի գործատուների հանրապետական միությունն ունի հզոր ներուժ` հանդես գալու որպես երկու երկրների գործարար համայնքի ներկայացուցիչներին կամրջող օղակ և նպաստելու հայ-կանադական փոխգործակցության զարգացմանը։