ՀԳՀՄ կանոնադրական կարևոր նպատակներից է Հայաստանում արդյունաբերական զարգացումը և արտահանման խթանումը, մասնավորապես ապրանքների մրցունակության և որակի բարձրացումը, արդյունաբերական ճյուղերի զարգացումը, դրանց տեխնոլոգիական և որակի կառավարման համակարգերի արդիականացումը և նորարարությունների կիրառումը (այդ թվում կանաչ տեխնոլոգիաներ):

Արդյունաբերական ընկերություններում և գյուղմթերքներ արտադրողների շրջանում ՀԳՀՄ-ն խթանում է միջազգային որակի կառավարման համակարգերի ներդնումը, անձնակազմի ուսուցանումը և այդ համակարգերի սերտիֆիկացումը ըստ միջազգային ստանդարտների (ISO 9001, ISO 22000 (HACCP), ISO 14001, IS0 45001, ISO 27001, ISO13485, ISO 13467, GlobalGap, BRC, CE և այլն): Բացի այդ, ՀԳՀՄ-ն աջակցում է տարբեր արտադրանքների փորձարկումների իրականացմանը ՀՀ և արտերկրի հավատարմագրված լաբորատորիաներում:  

Ապրանքների որակի խթանելու նպատակով ՀԳՀՄ-ն, համապատասխան պետական մարմինների հետ քննարկումներում, խրախուսում է պետական գնումներում որակի ISO սերտիֆիկատների առկայության կարևորությունը, ինչպես նաև նորարարությունների խթանումը պետական գնումների միջոցով:

Արդյունաբերության զարգացման նպատակով, ՀԳՀՄ-ն ուսումնասիրել է արդյունաբերական ընկերությունների առկա վիճակը և դրանց արդիականացման հնարավորությունները, ինչպես նաև պետական աջակցության գործիքակազմի արդյունավետության ուժգնացման ուղիները: ՀԳՀՄ-ն զգալի քայլեր է իրականացրել ՀՀ-ում մեքենաշինական արտադրանքի թողարկման և արտերկրում գործընկերներության ձևավորման ուղղությամբ: